Rejîmê AKPyî seba ke nêverdo 1ê Gulane Roşanê Karker û Kedkaran Taksîm de bêro pîrozkerdene, dest kerd ronayîşê barîyeranê fekê rayîr û kuçeyan ê ke vejîyenê Taksîmî
Komîteya Amadekarî ya 1ê Gulane, seba ke 1ê Gulane Roşanê Kerkeran Taksîm de pîroz bikera muracat bi selahîyetdaran kerdibî. Lalebê waştişê înan nêame qebûlkerdene. Mîyanê komîteye de, Konfederasyonê Sendîkaya Karkeranê Şorişgêrî (DÎSK), Konfederasyonê Sendîkaya Kedkaranê Rayapêroyî (KESK), Yewîya Odeyê Muhendis û Mîmaranê Tirkî (TMMOB) û Yewîya Tabîbanê Tirkî (TTB) ca gênê.
Dimayo ke muracat ame redkerdene, sendîkayan qerar da ke 1ê Gulane Wareyê Bazarî yê Bakirkoyê pîroz bikerê. Seba 1ê Gulane rê hîna hîrê rojî estê, labelê polîsanê Tirkî nika ra Taksîm girewto binê ablûqa.
Polîsanê rejîmî seba ke Wareyê Taksîmî bigêrê binê ablûqa, dest kerd ronayîşê barîyeranê fekê rayîr û kuçeyan ê ke vejîyenê Taksîmî. STENBOL
