Dewleta tirk a dagirker, gundên navçeya Şera Efrînê bi topan bombebaran kir. Li herêmê şerekî dijwar diqewime
Li gorî agahiyan, dewleta tirk a dagirker gundên Şiwarqa, Malikiye û Maranazê yên navçeya Şerayê ya Efrînê bi topan bombebaran kir. Tevî bombebaranê balafirên tirk ên şer li ser herêmê firiyan. Li herêma ku dewleta tirk bombebaran dike, şerekî dijwar dest pê kir. Li gorî agahiyên ji çavkaniyên xwecihî hatin wergirtin, li derdora Ezazê ya li pêşberî gundê Maranazê, du wesayitên zirxî yên bi tîpa Kîrpî yên rejîma tirk hatin rûxandin.
Efrîn ji aliyê dewleta tirk û çeteyên wê ve hatiye dagirkirin. Dewleta tirk 20’ê Çileya 2018’an dest bi êrîşên li dijî Efrînê kiribû û 18’ê Adarê bajar dagir kiribû. Ji dema êrîşên dagirkeriyê û vir ve bi rêk û pêk sûcên şer tên kirin. Dewleta tirk a dagirker û komên wê yên çete dest datînin ser malên gelê xwecihî, sivîlan ji bo fîdyeyê direvînin, îşkenceyê dikin û înfazan pêk tînin. Her wiha demografiya herêmê jî digerînin. EFRÎN
