HRE’yê têkildarî çalakiyên hêzên wan ên di demên dawî, daxuyaniyeke nivîskî weşand. HRE’yê da zanîn ku di encama çalakiyên li Şerayê de 2 jê payebilind, bi giştî 9 leşkerên artêşa tirk hatine kuştin û 14 leşker jî bi giranî birîndar bûne
Hêzên Rizgariya Efrînê (HRE) encama çalakiyên li Şerayê yên li dijî artêşa tirk, bi daxuyaniyeke nivîskî ragihand. Di daxuyaniyê de hat destnîşankirin ku di encama çalakiyê de 9 leşkerên dewleta tirk hatine kuştin.
HRE’yê di daxuyaniyê de diyar kir ku di çarçoveya çalakiyên hêzên wan ên li dijî artêşa tirk a dagirker û komên wê yên çete de, li navçeya Şera ya Efrînê herî kêm 9 leşkerên artêşa tirk hatine kuştin û 14 jî birîndar bûne.
Hûrgiliyên çalakiyê
Hûrgiliyên çalakiyê jî HRE’yê wiha parve kirin: “Yekîneyên me di 30’ê nîsanê de li gundê Qitme yê Şerayê, li 2 wesayîtên zirxî yên bi tîpa Kîrpî yên artêşa tirk a dagirker xistin. Di encama çalakiyê de wesayît hatin rûxandin û 7 leşkerên tê de hatin kuştin. Her wiha 5 leşker jî birîndar bûn. Di heman rojê de li heman herêmê hêzên me kemîn danîn ber yekîneyeke artêşa tirk a dagirker û şer qewimî. Di şer de 4 jê giran herî kêm 6 leşkerên dagirker birîndar bûn.”
2 leşkerên payebilind hatin kuştin
HRE’yê ragihand ku hêzên wan di 30’ê nîsanê de li herêma di navbera Şera û Ezazê de di encama çalakiyekê de wesayîteka zirxî ya artêşa tirk rûxand. HRE’yê da zanîn ku di çalakiyê de 2 leşkerên payebilind hatin kuştin û 3 jî birîndar bûn. Daxuyanî wiha bi dawî bû: “Artêşa tirk a dagirker piştî çalakiyan, bejahiya Şera û Şêrawayê bi obus û tankan bombebaran kir. Di heman demê de balafirên şer û firokeyên bêmirov jî li ser herêmê geriyan. Di çalakiyan de şervanekî me şehîd bû û 2 şervanên me jî bi sivikî birînda bûn.” EFRÎN
