Amed de laçig sipîyê ke tewrê şayîya 1ê Gulane bîyî seba ke vengê grevê vêşanîye û rojeyê mergî bidê eşnawitene rêzila merdimî viraşte û bi sloganan xoverdayîşê zîndanan silam kerd
Amed de rayberîya KESK, DÎSK û TMMOB’î de şayîya 1ê Gulane ameye organîzekerdene. Mîtîngo ke Meydanê Îstasyonî de ame viraştene xeylî sendîkayî kortejanê cîya-cîyayan rê ameyî têhet. Temsîlkaranê HDP, DTK, ESP, TKP û CHPyî ya pîya Grûba Hetkaranê Xoverdayîşî yê Amedsporî mîtîngî de cayê xo girewt.
Bi sebebê qedexeyê walîtîye cinîyê laçig sipîyî wexto derg nêeşkayî bikewê meydanî la tewr peynî de cinîyî ser kewtê û resayî meydan. Mîtîng de şexsê Leyla Guvene de xoverdayîşê zîndanan bi sloganan ame silamkerdene. Dayîkê tepişteyan bi laçiganê xo yê sipîyan û tîlîlîlîyan sefanê verînan de cayê xo girewt. Dayîkan destê yew bînan girewtî û bi rêzila merdimî balê ante xoverdayîşê grevê vêşanîye û rojeyê mergî yê ke semedê wedartişê tecrîdê serê Rayberê Şarê Kurdî Abdullah Ocalanî yenê viraştene.
Bi nameyê cinîyan Esra Adema ke Komîteya Hadreyîye ya Mîtîngî de ca gêna, dayîkî silam kerdî û va: “Ma demo ke tarîxkî ra ravêrenê. Faşîzm vera şaran heme hêzê xo şuxuleneno. La ma kedkarî do vera faşîzmî bi xoverdayîşî ser bikewê. Ma merg nê cuye, şer nê aşitî, bindestî nê azadîye wazenê û peynîya tewr peynî ma do ser bikewê.” AMED
