Çalakiya nobedê ya ku malbatên girtiyan ên Pirsûs û Wêranşarê daye destpêkirin didome. Di vê çarçoveyê de çalakiya nobedê ya li Pirsûsê kete roja 5’an û ya li Wêranşarê jî kete roja 4’emîn
Ji bo rakirina tecrîda girankirî ya li ser Rêberê Gelê Kurd Abdullah Ocalan, li girtîgehên bakurê Kurdistanê û Tirkiyeyê zêdetirî 7 hezar girtî di greva birçîbûnê ya bêdem û bêdorveger de ne. Ji 30’ê nîsanê ve jî 15 girtiyên ji doza PKK û PAJK’ê di çalakiya rojiya mirinê de ne. Ji bo piştgiriya bi grevên birçîbûnê re û bal kişandina ser rewşa girtiyan, malbatên girtiyan ên Pirsûs û Wêranşar a Rihayê dest bi çalakiya nobedê kiribûn.
Li gel ku polîsan çalakiya nobedê ya li avahiya HDP’ê ya Pirsûsê asteng kirin, malbat di roja 5’emîn de berxwedana xwe didomînin. Ji bo piştgiriya bi çalakiya nobedê re, gelek welatiyan malbatên girtiyan ziyaret kirin.
Çalakiya li Wêranşarê
Bi heman boneyê, malbatên girtiyan li avahiya HDP’ê ya Wêranşarê jî dest bi çalakiya nobedê kiribû. Çalakî 4 roj li pey xwe hişt. Li gel hemû astengiyên polîsan jî, gelek welatiyan çalakiya nobedê ziyaret kirin û piştgiriya xwe ya bi çalakiyên greva birçîbûnê re anîn ziman. RIHA
