Girtiyê bi navê Ahmet Ayboga ku li Girtîgeha Tîpa T ya Odemîş a Îzmîrê dimîne, demek berê pirtûkeke bi kurdî nivîsand û da çapkirin. Beriya çapê, pirtûka Ayboga ji hêla rêveberiya girtîgehê ve hate kontrolkirin. Rêveberiya girtîgehê niha jî bi hinceta ‘wergêr nîne’, nahêle ku Ayboga pirtûka xwe wergire
Binpêkirinên hikûmeta AKP-MHP’ê yên li girtîgehên bakurê Kurdistanê û Tirkiyeyê berdewam in. Bi taybet jî ev binpêkirin di demên dawî de zêdetir bûne. Di vê çarçoveyê de ji cezayên hucreyê heta qedexeya hevdîtin, nedayîna pêdiviyên jiyanî, lêdan û zextê, gelek binpêkirinên din li dijî girtiyan di meriyetê de ne. Li hêla din bêtehemûliya dewletê ya li dijî kurdî û pirtûkên kurdî jî berdewam dike.
Li gorî agahiyan, li Girtîgeha Tîpa T ya Odemîş a Îzmîrê bi hinceta ku ‘wergêr nîne’, pirtûkên kurdî nadin girtiyan. Pirsgirêka nedayîna pirtûkên kurdî her çiqas gelek caran hatibe rojevê jî û girtiyan gelek caran daxwazname ji dozgerên girtîgehê re şandibin jî, pirsgirêk heta niha jî nehatiye çareserkirin.
Pirtûka ku kontrolkirin niha nadin
Girtiyê bi navê Ahmet Ayboga ku li Girtîgeha Tîpa T ya Odemîş a Îzmîrê dimîne, pirtûkeke kurdî nivîsand û da çapkirin. Pirtûka Ayboga beriya ku bê çapkirin, ji hêla rêveberiya girtîgehê ve hate kontrolkirin. Lê balkêşe ku heman girtîgeh, nahêle ku Ayboga pirtûka xwe wergire. Weke hincet jî rêveberiya girtîgehê dibêje; ‘wergêr nîne.’
Serlêdan bêencam dimînin
Li girtîgehê tevî pirtûkên kurdî, her wiha kart û nameyên bi kurdî jî ji girtiyan re nayên dayîn. Ji bo çareserkirina vê pirsgirêkê girtiyan gelek caran daxwazname dan dozgeriya girtîgehê lê her tim bêencam man. ÎZMÎR
