Ji bo hevdîtina têkildarî çaresariya aloziya Sûriyeyê, nûnerên Almanya, Fransa, Misir, Urdun, Erebistana Siûdî, Ingilîstan û DYA’yê bi serokatiya Nûnerê Taybet ê NY yê ji bo Sûriyeyê Geir Pedersen li Cenevreyê civiyan
Nûnerê Taybet ê Neteweyên Yekbûyî (NY) yê ji bo Sûriyeyê Geir Pedersen piştî ku dest bi wezîfeya xwe kir, yekemîn car bi nûnerên Almanya, Fransa, Misir, Urdun, Erebistana Siûdî, Ingilîstan û DYA’yê re ji bo çareseriya siyasî ya şerê li Sûriyeyê li Cenevreyê hevdîtin pêk anî.
Civîna nûneran, li ofîsa NY’yê ya li Cenevreyê pêk hat. Di civînê de Nûnerê Taybet ê DYA’yê yê ji bo Sûriyeyê James Jeffrey, Nûnerê Taybet ê Almanyayê Robert Rohde, asîstanê Wezîrê Karên Derve yê Misrê Yasser Elwy, Nûnerê Taybet ê Fransayê Francois Senemaud, Nûnerê Taybet ê Urdunê Harron Hasan, Nûnerê Taybet ê Erebistana Siûdî Thamer Sabhan û Nûnerê Taybet ê Îngilîstanê Martin Longden amade bûn.
Geir Pedersen ku hefteya bihurî tev li civîna Astanayê ya bi garantoriya Rûsya, Îran û Tirkiyeyê bûbû û anî ziman ku pêwîstî bi afirandina formuleke hevpar a destekê dide hevdîtinên Cenevreyê, heye. Tê payîn ku Pedersen hefteya bê li Cenevreyê bi nûnerên taybet ên Rûsya, Îran û Tirkiyeyê re hevdîtinê bike.
Hevdîtinên Cenevreyê herî dawî di 14’ê îlona sala 2018’an de bi pêşengiya Nûnerê Taybet ê NY yê berê Staffan de Mistura pêk hatibû. De Mistura dema ku wezîfeya xwe radestî Pedersen kir gotibû ku ew di karê xwe de bi ser neketiye. CENEVRE
