HDP’a Edeneyê ji bo piştgiriya bi girtiyên ji bo rakirina tecrîda li ser Ocalan de greva birçîbûnê de ne, kampanyaya nameyan da destpêkirin. Di her rojên sêşemê de nameyên hatin nivîsandin ji girtiyan re tên şandin
Ji bo piştgiriya bi girtiyên li girtîgehên bakurê Kurdistanê û Tirkiyeyê ji bo rakirina tecrîda girankirî ya li ser Rêberê Gelê Kurd Abdullah Ocalan di greva birçîbûnê de, Partiya Demokratîk a Gelan (HDP) a Edeneyê bi dirûşma ‘nameyek vala jî biqîmet e, tu jî name û kartekê ji mirovên azad ên di zindanan de re bişîne’ dest bi kampanyaya nameyan kir.
Bi vê boneyê li avahiya HDP’ê ya Edeneyê quncikek hate veqetandin. Têkildarî mijarê endama Meclisa Jinê ya HDP’a Edeneyê Sûzan Kiliç axivî û da zanîn ku heta niha bi dehan name hatine nivîandin. Kiliç got ku nameyên ku tên nivîsandin di rojên sêşeman de tên şandin.
Mirinê bidin sekinandin
Kiliç destnîşan kir ku ji bo piştgiriyê nameyeke vala jî girîng e û divê girtî bizanin ku ruhê wan bi wan re ye. Rêvebera Meclisa Bajêr a Kongreya Demokratîk a Gelan (HDK) Olcay Susgun jî bi lêv kir ku tecrîd mirine û wiha bang kir: “Mirinê bidin sekinandin. Divê her kes bi hestiyarî tevbigere.” EDENE
