Qurbanîyê Qirkerdişê Dêrsimî xeylê bajaranê Ewropa de ameyî vîrardene
Bajarê Berlîn û Ludwigsburgî yê Almanya de û bajarê Zurîch û Baselî yê Swîsî de qurbanê Qirkerdişê Dêrsimî ameyî vîrardene.
Berlîn: Bajarê Berlînî yê Almanya de, qerarê Operasyonê Tenkîlê Tûnçelî yê 4ê Gulana 1937î ame şermezarkerdene. Mîtîng verê Temsîlkarîya Berz a Berlînî de ame viraştene. Çalakîye de fotografê rayberanê xoverdayîşê Dêrsimî ameyî akerdene, bi nameyê Însîyatîfê Azadîye yê Berlîn-Dêrsimî eşkerayîye ameye dayene. Eşkerayîye de ame vatene, 4ê Gulane 1937 seba Dêrsimî rojêka sîya ya û tarîxê dinya de seba qetilkerdişê şarêk û bawerîyêk nimûneyêko winayên çin o. Hemserekê Meclîsê Kurdistanijanê Azadan ê Berlînî Erhan Firatî zî bale ant muhîmîya wayîrvejîyayîşê xoverdayîşê grevê vêşanîye yê vera faşîzmî ser û va: “Dewleta tirkî morê xo dayo binê bi desan komkiştişan ro.”
Parlamenterê Partîya Çepe Hakan Taşî zî qurbanê komkiştişê Dêrsimî yad kerdî û va: “Ma ê xo vîr a nêkerdî, ma do xo vîr a nêkerê. Komkiştiş û zulm temamê Tikrîya û Kurdistan de dewam keno. Almanya û Yewîya Ewropa (YE) hîna bêveng ê. Waştişê 7000 merdimanê ke grevê vêşanîye de yê waştişê ma yê. Seba ke zêdetir zirar nêreso merdiman ganî tecrîdê serê Abdullah Ocalanî bêro wedaritene.” Peynîya mîtîngî de sloganî ameyî qîrayene.
Ludwîgsburg: Bajarê Ludwîgsburgî yê Almanya de kesê ke komkiştişê Dêrsimî de cuya xo vîndî kerdê ameyî yadkerdene. Yadkerdiş Komala Beceklî de ame viraştene û bi deqayêk rêzgirewtişî dest pêkerd. Qiseykerdoxan vat, “Qirkerdişê Dêrsimî, 4’ê Gulane roja sîya ya. Ganî her kes na roje sey rojêka sîyaye bîyaro xo vîrî.”
Zurîch: Bi rayberîya Însîyatîfê Dêrsimî bajarê Zurîchî yê Almanya de rayraşîyayîşêk ame viraştene. Endamê Federasyonê Karkeranê Koçberan ê Swîsî (ÎGÎF) yê ke seba paştdayîş bidê grevê vêşanîye yê vera tecrîdî 3 rojî yo grevê vêşanîye de yê, tewrê rayîraşîyayîşî bîyî.
Bi eynî amancî bajarê Baselî yê Swîsî de zî rayraşîyayîşêk ame viraştene. ALMANYA/SWÎS
