Li Parîsê hejmara yekem a kovara xwendekarên kurd a bi navê Kurd’Inalco derçû
28´ê nîsanê yekem hejmara kovara xwendekarên kurd ên li paytexta Fransayê Parîsê bi navê Kurd’Inalco derçû. Pirraniya xwendekarên kovarê derdixin di bernameyên lîsans û mastirê de ne.
INALCO kurteya “Institut National des Langues et Civilisations Orientales (Înstîtuya Neteweyî ya Ziman û Şaristaniyên Rojhilatî)” ye. Zimanê Kurdî li INALCO´yê ji sala 1948´an ve weke ders tê dayîn, bi înîsiyatîfa Roger Lescot van dersan dest pê kiribû. Di destpêkê de tenê dersa Kurmancî hebû, paşê yên Soranî jî li dersan hatin zêdekirin.
Kamuran Bedirxan, Abdurehman Qasimlo et Halkawt Hakem lê ders dane.
Ji bo çi kovarek?
Edîtoriya kovarê sedema derxistin û awayê derxistina kovara Kurd´Onalco de dibêjin, “Îro roj, xwendekarên kurd ên INALCO û zanîngehên din ên li Parîsê biryar da ku li ser vê rêya ku întelektuelên danî bimeşin û xwe bidin ber vî barê giranbuha.”
Di hejmara yekê ya ji 83 rûpelan a Kurd’Inalco de mijarên gramer, wêje, zanistên siyasî, teknolojî û matematîk hene.
Herçî gotar in, hem bi kurmancî û hem bi soranî edîtoriya wan tê kirin. Kesên hez dikin xwe bigihînin vê kovarê, dikarin bi rêya e-maila li jêr peywendiyê deynin bi kovarê re: [email protected] PARÎS
