Xoverdayoxê Rojeyê Mergî ra Abdulhalik Kaplanî seba wedarnayîşê tecrîdê serê Rayberê PKKyî Abdullah Ocalanî û bêvengîya rayapêroyî, roja rojbîyayîşê xo de kewt rojeyê mergî. Dayîk û pîyê Kaplanî, Nizamettin Kaplan û Aysel Kaplane ardî ziwan ke ê qerar û xoverdayîşê lajê xo silam kenî û vatî: “Ganî dewlete gaman bierza û vengê Ocalanî bêro eşnawitene.”
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) ya verên û Parlementera Partîya Demokratîke ya Şaran (HDP) ya Colemêrgî verên Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş roja 180. Xo dima vera daye. Çalakîya grevê vêşanîye 16ê Kanûna 2018î de zîndanan de dest pêkerde, 1ê Adare de vilayê pêroyê zîndanan bîye û nika bi hezaran hepsîyî grevê vêşanîye yê bêdem û anêgêrayîşî de yî. Destpêkerdişê grevê vêşanîye ra nata hukmat tu gamêk nêeşto û tecrîd hema zî dewam keno. Tewr peynî 15 hepsîyê PKK û PAJKî çalakîya xo 30ê Nîsane de derbazê merheleyêka newe kerdî û rojeyê mergî dayî dest pêkerdene. Zîndananê Amed, Wan, Bakirkoy û Gebzeyî de 5ê ci cinî pêro-pîya 15 hepsîyî kewtî rojeyê mergî û çalakîya înan kewte roja 7. Ganî bêro vîrvistiş ke rewşa weşîya çalakgeran her ke şona xidar bena.
Xoverdayoxê Rojeyê Mergî ra Abdulhalik Kaplanî Zîndanê Tîpa Dyî yê Amedî de tewqîfkerde yo. Abdulhalîk Kaplanî 8ê Adare de dest bi grevê vêşanîye kerd û 30ê Nîsane de tewrê 15 hepsîyanê sîyasî kewt rojeyê mergî. Kaplanî 30ê Nîsana 1986î de qezaya Licê ya Amedî de ameyo dinya û roja rojbîyayîşê xo de kewt rojeyê mergî.
23 serrî cezaya zîndanî ci rê ame birnayene
Kaplanî seba şerê hemverê DAIŞî yê Kobanî serra 2014î de tewrê YPGyî bî. Kaplanî pêrodayîşê hemverê DAIŞî de birîndar bî û nêweşxaneyêk Tirkîye de ame dermankerdene. Kaplanî wexto ke ameyêne dermankerdene bi îdîaya endamîya YPGyî ame tepiştene û tewqîfkerdene. Dima ra zî 23 serrî cezaya zîndanî ci rê ame birnayene.
Ganî dewlete gaman bierza
Derheqê babete de dayîk û pîyê Kaplanî, Nizamettin Kaplan û Aysel Kaplane qisey kerdî û ardî ziwan ke ê qerar û xoverdayîşê lajê xo silam kenî. Nizamettin û Aysel Kaplane dayî zanayene ke ganî dewlete gaman bierza û vengê Ocalanî bêro eşnawitene.
Ganî waştişê domananê ma bêrî caardene
Pî Nizamettin Kaplanî (62) dîyar kerd ke na rewşe seba dayîk û pîyêk zaf zehmetin a û va : “La ma seba ke no qerarî ê bi îradeya xo girewtî hurmet nîşan danî. Bi îradeya xo tewrê YPGyî bî. Reyna bi îradeya xo dest bi rojeyê mergî kerd. No welat de 20 mîlyon kesî birêz Ocalanî sey Rayberê Şarî qebûl kenî. Ma qerar û xoverdayîşê lajê xo silam kenî. Heqê Ocalanî yê qanûnê yenî astegkerdene. Domanê ma seba herînayîşê heqê Ocalanî bedenê xo dayî merg ver û dest bi rojeyê mergî kerdî. Ganî Tirkîye bi hawayo lez agêra qanûnanê xo ser. Verê ke cenaze nêvejîyayî, zerrîya dayîkan nêwêşaya, ganî waştişê domananê ma bêrî caardene. Ma aşma Remezanî de yî. Ganî ma vengê xo bikerî vengê înan.”
Aştî û çareserî bi eşnawitişê vengê Ocalanî mumkun o
Dayîk Aysel Kaplane (57) zî qiseykerdişê xo de wina va: “Sey pêroyê dayîkan zerrîya mi vêşena. Domanê ma tena waştişê wazenî. Ê wazenê ke dewlete qanûnanê xo caabîyara û tecrîdî wedarna. Nika ke kesêk cuya xo vindî nêkerdo, ganî waştişê domananê ma bêrî caardene. Zerrîya ma vêşena. Ganî vengê Ocalanî bêro eşnawitene. Aştî û çareserî bi eşnawitişê vengê Ocalanî mumkun o.” AMED
