Hevserokên HDP’ê Pervîn Buldan û Sezaî Temellî der barê hevdîtina parêzeran a bi Ocalan re daxuyaniyeke nivîskî weşand. Hevserokan hevdîtina bi Ocalan re weke gaveke erênî nirxand
Parêzerên Rêberê Gelê Kurd Abdullah Ocalan piştî 8 salan, cara yekemîn di 2’yê gulanê de bi muwekîlê xwe re axivîn. Têkildarî mijarê hevserokên Partiya Demokratîk a Gelan (HDP) Pervîn Buldan û Sezaî Temellî daxuyaniyeke nivîskî weşand. Di daxuyaniyê de hevserokan destnîşan kir ku her çiqas dereng jî be, di hêla hiqûqî de gavekî erênî ye.
Di berdewamiya daxuyaniyê de jî hat diyarkirin ku ji bo ev pirsgirêk bi temamî ji holê rabe, divê hemû mafên Ocalan ên li gorî hiqûqa navxweyî û navneteweyî bên bicihanîn. Hevserokan daxuyand ku dewleta tirk di demekî krîtîk re derbas dibe û çareserkirina pirsgirêkan a di çarçoveya hiqûqa gerdûnî û mafên mirovan de bingeha siyaseta parlamenter û demokratîk e.
Hevserokan diyar kir ku dê israra xwe ya di siyaseta demokratîk û aştiyê de bidomînin. ENQERE
