Îmam Şîş ku ji bo bidawîbûna tecrîdê 142 roj in di greva birçîbûnê de ye got ku heta tecrîd bi temamî bi dawî bibe dê çalakiya xwe bidomîne
Îmam Şîş ku ji bo bidawîbûna tecrîdkirina Rêberê Gelê Kurd Abdullah Ocalan li bajarê Newport ê Gallerê 142 roj in di greva birçîbûnê de ye, ji bo hevdîtina duh a parêzeran bi Ocalan re daxuyaniyek da û diyar kir ku hevdîtin gaveke gelekî mezin û serketî ye lê bele heta ku tecrîda li ser Ocalan neyê rakirin dê çalakiya xwe bidomîne.
Di daxuyaniyê de hate zanîn ku çalakiyên greva birçîbûnê yên bêdem û bêdorveger ên bi pêşengiya hevseroka KCD’ê Leyla Guven ve hatiye destpêkirin û didomin, îro serketineke mezin bi dest xistine.
Daxuyaniya Îmam Şîş wiha ye: “Rêbertî piştî 8 salan yekem car 2’yê Gulanê parêzerên xwe dît. Li gorî agahiyan, xuya ye tecrîda bêhiqûqî ya li ser Rêber Apo bi temamî ranebûye, lê belê polîtîkaya faşîzan a dewleta tirk a li ser Îmraliyê ji têk çûye. Faşîzmê bi vê berxwedanê re derbeke mezin xwar û careke din ji binî ve hejiya. Tevî van hemûyan; di serî de hevrêyên li zindanan di rojiya mirinê de ne, di çarçoveya girêdana xwe ya bi hevalên berxwedêr hemûyan re; daxuyaniya ji zindanan hate dayîn mafdar dibînim, qebûl dikim û dibêjim; heta ku neyê aşkerakirin ku tecrîd bi temamî bi dawî bûye û bi rengekî qanûnî hatiye ewlekirin, ez ê çalakiya xwe bi biryardarî bidomînim.
Dor hatiye azadiya Rêber Apo
Hevalên Zulkuf Gezen, Ayten Beçet, Mahsûm Pamay, Yonca Akinci, Sîraç Yuksel, Zehra Saglam û Medya Çinar ku ji bo berxwedanên greva birçîbûnê bigihêjin vê serketinê bi çalakiyên xwe yên fedayî yên dîrokî dest li pêvajoyê werdan, bi hezkirin, hesret û minet bi bîr tînim. Di şexsê wan de şehîdên leheng hemûyan bi bîr tînim û em soz didin ku em ê têkoşîna wan bi ser bixinin.
Her wiha di serî de Leyla Guven a ku dest bi vê berxwedanê kir, berxwedêrên li zindanan hemûyan, hevrêyên li her qadê li ber xwe didin, dayikên me yên li dijî êrîşan li ber xwe didin, gelê me û dostên me bi rêzdarî silav dikim û diyar dikim, ji ber ku bi wan re di nava heman berxwedanê de me ez serbilind im.
Di pêvajoya vê çalakiyê de hin hêz û derdorên bûne esîrê koledariyê, hem bêdeng man hem jî li çalakgerên ji bo armanca pîroz a azadiyê li ber xwe didin, pirsîn. Vê helwesta wan şermezar dikim û bang li wan dikim ku helwesteke rast nîşan bidin û xwe nêzî têkoşîna azadiyê bikin. Ji bo tu tiştî dereng nîne. Niha dema dema azadiya Rêbertî û Kurdistanê ye. Dem hatiye ku faşîzma AKP-MHP’ê ku bi hilbijartinên xwecihî re derizî, bi temamî hilweşînin.
Têkoşînê bêhtir mezin bikin
Ji bo me gelê kurd, her kêliya ku Rêber Apo li zindana Îmraliyê ye, her kêliya ku Rêbertî li gund û bajarên Kurdistanê bi rengekî azad ne di nava gel de ye, her roja bêyî dengê wî derbas dibe tecrîd e. Divê ji bo her kesî şerma herî mezin be ku bêyî parçekirina zindana Îmraliyê û pêkanîna azadiya fîzîkî ya Rêbertî li şûna xwe rûnê, lê temaşe bike û çerxa modernîteya kapîtalîst bigerîne.”
Divê azadiya Ocalan bibe xala bingehîn
Her wiha di daxuyaniyê de hat destnîşankirin ku divê ew pêkanîna azadiya Ocalan bikin xala bingehîn a têkoşîna xwe û bang li her kesî hate kirin ku ji bo Rojhilata Navîn a demokratîk û azad, ji bo dinyayeke wekhev her kes bi erka xwe ya mirovahiyê tevbigere, dawî li tecrîdê bîne û têkoşînê geş bike. NEWPORT
