Xoverdayoxanê rojeyê mergî ra Asli Dogane ard ziwan ke na merheleya muhîme ya xoverdayîşî de tena qale nêvejena û va: “Kardî êdî este de ya. Ganî her kes destê ci ra çi yeno bikero.”
Asli Dogana ke 13 serrî yo zîndan de ya û nika Zîndanê Gebze de rojeyê mergî de ya bale ante heta ke tecrîd bibo do qirkerdiş dewam bikero û va: “Eke ma xo ra bawer bikerê û destê ma ra çi yeno bikerê ma do tecrîdî bişikne û ser bikewê.”
Xoverdayoxanê rojeyê mergî ra Asli Dogana ke Zîndanê Gebze de ya 1979 de qezaya Depî ya Xarpêtî de ameya dinya û 2002 de tewrê sefanê Têgêrayîşê Azadîye Kurdistanî bîya. Dimayê hewldayişê axukerdişê Rayberê Şarê Kurdî Abdullah Ocalanî û xorîkerdişê tecrîdî semedê çalakîyêka fedaîye 2006 de ravêrte Tirkîya. Sereyê 2007î de tepişyaye û 13 serrî yo zîndan de ya. Dogane 1ê Adare de tewrê xoverdayîşê grevê vêşanîye bîye û dime ra 30ê Adare de çalakîya xo açarnaye rojeyê mergî.
Dogane 5ê Gulane de mektubêk şawite û nê vatî: “Moralê ma berz o û ma biqerar û bibawer ê. Faşîzmê AKP-MHPyî seba qirkerdişî biisrar o. Ma zî seba ke qerardar ê ke tecrîd bişiknê ma çalakîya xo hîna xurt kerde. Waştişê qirkerdişî Rayberê Şarê Kurdî bidê vîrakerdene û ma bê nasname, rayber, tarîx, zîhnîyet û îdareyî verdayiş o. Sîstemê îşkenceyê Îmraliyî merkezê qirkerdişî yo. Heme tewirê şerê taybet û psîkolojîk verî uca dime ra vera şarî yenê şuxulnayene. No qirkerdiş o. Heta ke tecrîdê Îmraliyî mero şikitene qirkerdişê serê şarê Kurdî zî do dewam bikero. Nika wextê qale nê wext wextê xoverdayîşî o. Tena vatişê raştîyan û rexnekerdiş nevejeno. Xora çîyê wînayên tecrîd hîna kenê weye. Ganî ma hinî hemparê qirkerdiş û nê sucî mebê. Kardî este de ya. Nê rojanê ke ma tede yê ma eşkenê qederê tarîxê xo bewlî bikerê. Semedê naye zî ganî her kes cayo ke tede yo destê ci ra çi yeno bikero. Ganî şar û zîndanî yewbînan temam bikerê. Tarîxê ma bi xoverdayîşan pirr o.Dewaya ma ya 40 serran a girde de ma wayîrê tecrubeyî yê. Tena ma xo ra bawer bikerê ke ma eşkenê tecrîdî bişinê û wa paştê ma, ma ra pît bo. Eke ma yewbînan temam bikerê ma do miheqeq ser bikewê.” KOCAELÎ
