Merdimê hepsîyan semedê vengê xoverdayoxanê zîndanan bidê eşnawitene ewro zî verê xo da Zîndanê Bakirkoyî. Polîsan hêrişê keyeyan kerd û xelî kesan tepiştî
Merdimê hepsîyan ke semedê vengê xoverdayoxanê zîndanî yê ke semedê wedartişê tecrîdê serê Rayberê Şarê Kurdî Abdullah Ocalanî grevê vêşanîye û rojeyê mergî de yê, bidê eşnawitene waşt ke verîya Zîndanê Bakirkoyî de bêrê têhet. Polîsan reyna destûrê çalakîya roniştişî ya merdimanê tepişteyan nêda û xeylî kesî tepiştî.
Muxabîrê Ajansê Xeberan ê Mezopotamya Îrfan Tuncçelîko ke polîs destûr nêda dîmend bianco dime ra o zî ame tepiştene.
Nameyê kesê ke ameyî tepiştene û heta nika nameyê înan ameyî zelalkerdene wina yî: Hûrî Tayfûre, Sacîde Tayfûre, Emîne Kaya, Vetha Bîngole, Nacîye Karabaşe, Asûman Çeşme, Yeter Seyhane, Gulsum Dage, Emîne Sarûhane û Gulere û Beyaze yê ke peynameyê înan nêameyo hema aşkerakerdene. STENBOL 
