Parêzerên Ocalan ji bo hevdîtina bi muwekîlê xwe re serî li Serdozgeriya Komarê ya Bursayê dan
Parêzerên Rêberê Gelê Kurd Abdullah Ocalan, Cengîz Yureklî, Newroz Uysal, Faîk Ozgur Erol û Mazlum Dînç ji bo hevdîtina bi muwekîlê xwe ku li Girtîgeha Tîpa F ya Bi Ewlehiya Bilind a Îmraliyeyê tê girtin, serî li Serdozgeriya Komarê ya Bursayê dan. Parêzeran di serlêdanê de ji bo sibê û roja înê daxwaza hevdîtinê kirin.
Parêzerên Ocalan ji 27’ê tîrmeha sala 2011’an heta 2’yê gulana îsal, 810 caran ji bo hevdîtina bi muwekîlê xwe re serlêdan dikirin. Serlêdanên parêzeran her carê bi hincetên weke ‘muxalefeta hewa heye’, ‘keştî xerabe ye’, ‘keştî di tamîrê de ye’, ‘OHAL heye’ û ‘xala 5275’an’ dihat redkirin.
Herî dawî ji parêzerên Ocalan, Nevroz Uysal û Rezan Sarica di 2’yê gulana îsal de bi Ocalan re hevdîtin kirin. STENBOL
