Dêrsim de çalakîya ke semedê baleantişê serê grevê vêşanîye hetê rêxistina HDP’yî ra bi şîarê ‘Veng bidê cuye wa tecrîd wedarîyo‘ yena viraştene vizêr roja 10. de dewam kerde
Çalakîya roniştişî ya ke semedê baleantişê grevê vêşanîye yê ke semedê wedartişê tecrîdê serê Rayberê Şarê Kurdî Abdullah Ocalanî yenê viraştene hetê Partîya Demokratîke ya Şaran (HDP) ya Dêrsimî ra yena viraştene, vizêr roja 10. de dewam kerde.
Dêrsim de reyna Meydanê Seyîd Rizayî de çalakîya roniştişî de bale anciya greve vêşanîye yê ke rayberîya Leyla Guvene de yenê viraştene ser. Çalakîya vizrêrî de reyna xeylî kesî ameyî têhet. Temsîlkarê partîyanê sîyasîyan û dezgehan, xeylî hemwelatijî û waya Mazlûm Doganî Serap Mutlu tewrê ci bîyî.
Çalakîye de hemserê HDPyî yê Dêrsimî Hidir Çîçekî qisey kerd. Çîçekî vist vîr ke çalakîya Leyla Guvene kewta roja 190ine û va: “Bi hezaran kesî grevê vêşanîye de yê. Rojayê merdî yenê domnayene. Beno he her hele zîndanan ra xebera mergî bêro. Seba ke vernîya mergan bêro girewtene ma çalakîye de yê. Heta ke waştişê xoverdayoxan nêrê ca çalakîya ma do dewam bikero.”
Çalakîya ke bi laçiganê sipîyan bale anciya xovedayîşê Dayîkanê Aşitîye zî ser bi çepikan û sloganan qedîyaye. DÊRSIM
