Çalakîya roniştişî ya Dêrsimî ya ke semedê paştdayîşê xoverdayoxanê grevê vêşanîye yena viraştene de vizêr Kaypakkaya ame vîrardene
Çalakîya roniştişî ya ke hetê rêxistina Partîya Demokratîke ya Şaran (HDP) ya Dêrsimî ra semedê paştdayîşê grevê vêşanîye û rojeyê mergî Meydanê Seyîd Rizayî de yena viraştene vizêr roja 13. de dewam kerde. Îdarekaranê HDPyî ya pîya parlementera Amedî Semra Guzele û wendekarî bi laçiganê sipîyan tewrê çalakîye bîyî.
Semra Guzele ke çalakîye de qisey kerd Îbrahîm Kaypakkayayo ke 46 serrî cuwa ver Zîndanê Amedî de bi îşkenceyî ame qetilkerdene û Hakî Karero ke 42 serrî cuwa ver Dîlok de ame qetilkerdene ardî vîr û va: “Zîndanê Amedî yo ke îşkence, merg, grevê vêşanîye û rojeyê mergî rê şahîdî kerde, tarîx nuşt. Leyla Guvene zî Zîndanê Amedî de dest bi grevê vêşanîye kerd û ewro bi hezaran tepişteyî grevê vêşanîye de yê.”
Guzele bale ante serê xoverdayîşê dayîkan û wina dewam kerd: “Seba ke zîndanan ra tabûtî mevêjîyê mucadele kenê. No mucadeleyê ma pêrune yo. Eke no tecrîd komelkî tesîrê ci ma pêrune ser o esto ganî semedê wedartişê tecrîdî ma pêro pîya mucadeleyî xurt bikerê. Heta ke tecrîd wedarîyo ê zere de ma teber de do xoverdayîş bidê domnayene.” DÊRSIM
