Dinya de tu cayêk de merdim nêeşkeno nê çiyan bivîno. Helbet kokê heme dewletan eynî yo û eynî bingehan ser o pergalanê xo nayê ro. Labelê tay bo zî dewletê ke demokrasî xo rê esas girewtî yan zî xo nêzdîyê demokrasî hîs kenî estî. Hûmara nê dewletan kêm a. Û ma eşkenî vajî ke hişmendîya nê dewletan yan zî hişmendîya pergala nê dewletan ê bînan ra cîya yê. Dewleta ke ma tede cuyenî zî cîya ya. Cîyayîya na dewlete başî ser o ney xirabî ser o ya. Eke başî bîyêne xura nika halê ma zaf cîya bi. La wina nîyo û her roje aver ney apey şina. Tirkîye bi kerdenanê xo yê çend serranê peyênan mohra xo da lîsteya sîya ya xirabîyan a seserra 21in. Xura nêzdîyê 100 serran o zilmo ke Kurdan ra kena aye eşto mîyanê dewletanê zilmkaran. Zilmê xo domnena û bi metodanê neweyan kena ke Kurdan dûrî micadeleyî bifîno û xoverrodayîşê înan pûç bivejo.
Eynî rayîran ser o nika dewlete kena ke xoverrodayîşê Kurdan, Kurdan ra bikera xerîb û înan bi no qeyde rojevan ra dûrî biverda. Her çi ra ver gere Kurdî na kerdena dewlete baş bivînî û goreyê aye têwbigêrî. Labelê rîyê zilm û tedayê dewlete ra Kurdî nê demanê peyênan de nêeşkenî sey verî têwbigêrî. Sebebê na rewşe zêde yê. La sebebo tewr pîl merdim gere xo de bivîno û sere de xo rexne biko. Kurdî bi waştişê xo nêameyê na rewşe, raşt o la bi waştişê xo na rewşe domnenî. Senî beno, senî şarêk bi waştişê xo zilmo ke sereyê ey de yo domneno, şaro ke bi serran o xo ver dano senî xo ardo nê halî û sewbîna persî…
Eke şarêk vera zilmî de bêveng bimano û çiyêk nêvajo, biwazo nêwazo beno hemparê zilmî û her çi ci rê beno musteheq. Aye ra vatişê şar zilmo ke sereyê ey de yo domneno, xo keno raşt û heme rexneyî tadîyenî şarî. Nika zî wext wextê vindertişê vera zilmî yo labelê vera zilmî de vindertişêko lokal esto. Şar pêro vera zilmî de nêvindeno heta heta nêmeyê şarî zî mîyanê vindertişêko winasî de nîyo. Çalakîya grevê vêşanîye xoverrodayîşê demî yo. Na çalakî vera zilmî de dîya destpêkerdene û nika hemleya diyîne de yanî bi rojeyê mergî dewam keno. Kurdî tu prosesan de sey nê prosesî bêveng nêmendibî. Nabênê bêvengîya dewlete û şarî de cîyayî bibî zî netîce nêbedelîno. Peynîya peynî çalakgerî tena verdîyenî û vengê înan nêreseno tu cayêk. Waştişê înan zelal o labelê vindertişê dewlete zelal nîyo. Dewlete çalakîya grevê vêşanîye vînena la nêwazena gaman bierza. En peyên Wezîrê Edaletî A.Hamît Gulî beyanatêk da û vat, qedexeyo ke şîyayîş û ameyîşê Îmrali ser o bi wedarnayê. Beyanatê Wezîrê Edaletî kerdenanê dewlete ra zaf cîya yo. Dewlete tena rayêk verdaya avukatî şêrî Îmrali û Rayverê Şarê Kurdî Abdullah Ocalanî de pêvînayîşêk bikerî. Avukatî zaf rey muracatî kerdî la înan ra tu cewab nêameyo dayene. Beyanat û kerdenê dewlete yewbînan nêtepişenî û heta ke wina bo çalakîya grevê vêşanîye do dewam biko.
