Çalakîya Esenyûrtî ya ke semedê paştdayîşê xoverdayîşê tepişteyan yena viraştene, vizêr zî rixmê polîsan dewam kerde
Çalakîya Esenyûrtî ya Stenbolî ya ke semedê wayîrvejîyayîşê xoverdayoxanê grevê vêşanîye û rojeyê mergî yena viraştene, vizêr zî binê ablûqaya polîsan de ameye domnayene.
Keyeyê tepişteyan ê ke zîndanan de vera tecrîdkerdişê Rayberê Şarê Kurdî Abdullah Ocalanî grevê vêşanîye û rojeyê mergî de yê, rêxistina Partîya Demokratîke ya Şaran (HDP) ya Esenyûrtî de ameyî têhet, ûca ra heta meydan rayra şîyî û dest bi çalakîya xo ya roniştişî kerde. Polîsan nasnameyê heme çalakgeran kontrol kerdî û bi wesayîtanê zirxinan derûdorê înan girewt binê ablûqa. Merdimanê tepişteyan ard ziwan ke heta bicaardişê waştişanê xoverdayoxan çalakîya înan do dewam bikero. STENBOL
