Girtiya di çalakiya rojiya mirinê de Asli Dogan ku li Girtîgeha Tîpa M ya Gebzeyê tê girtin da zanîn ku gardiyanan di 15’ê gulanê de bi ser qawîşên wan de girtiye. Dogan diyar kir ku gardiyanan dest danîne ser radyoyên wan
Li girtîgehên bakurê Kurdistanê û Tirkiyeyê bi hezaran girtî ji bo rakirina tecrîda girankirî ya li ser Rêberê Gelê Kurd Abdullah Ocalan di greva birçîbûnê ya bêdem û bêdorveger de ne. Her wiha 30 girtiyên ji doza PKK û PAJK’ê jî bi heman daxwazê di rojiya mirinê de ne. Ji roja destpêkê ya çalakiyê heta niha girtî rastî zext û zordariya rêveberiyên girtîgehan tên.
Yek ji girtiyên di çalakiya rojiya mirinê de jî Asli Dogan e. Dogan ku li Girtîgeha Tîpa M ya Gebze ya Kocaeliyê tê girtin, ji 30’ê nîsanê ve di çalakiya rojiya mirinê de ye. Çalakiya Dogan 21 roj li pey xwe hişt. Dogan têkildarî rewşa dawî bi parêzerê xwe re axivî. Dogan da zanîn ku di roja 15’ê gulanê de gardiyanan di nav de qawîşa wan jî, bi ser 3 qawîşan de girtiye.
Di berdewamê de jî Dogan daxuyand ku gardiyanan di qawîşên wan de lêgerîn kir û dest danîn ser radyoyên wan. Dogan ragihand ku di heman demê de nameyên ku ji bo wan tên û yên ku ew dişînin ji hêla girtîgehê ve tê reşkirin. KOCAELÎ
