Çalakgerê greva birçîbûnê Herêm Mehmûd da zanîn ku heta tecrîda li ser Ocalan bi dawî dibe dê çalakiya xwe berdewam bike. Mehmûd got ku divê temamiya gelê kurd xwedî li çalakiya wan derkeve û li dijî zilmê bisekine
Welatiyê bi navê Herêm Mehmûd ji bo rakirina tecrîda girankirî ya li ser Rêberê Gelê Kurd Abdullah Ocalan, li Kelara Germiyanê dest bi çalakiya greva birçîbûnê ya bêdem û bêdorveger kir. Çalakiya Mehmûd 86 roj li pey xwe hişt. Herêm Mehmûd têkildarî rewşa xwe ji ajansa RojNewsê re axivî. Mehmûd destnîşan kir ku divê gelê kurd li dijî zilmê xwedî li çalakiya wan derkeve.
Herêm Mehmûd anî ziman ku di despêka çalakiyê de piştgiriya ji bo çalakgeran kêm bû lê roj bi roj berfireh bû û hîn berfirehtir dibe. Mehmûd got ku welatparêzên di nava hizb, aliyên siyasî, ol û pêkhateyan de tên serdana wan û piştgiriya xwe ya bi wan re tînin ziman. Mehmûd bi lêv kir ku heta ku tecrîd bi dawî dibe jî dê çalakiya xwe berdewam bike.
Bang li gelê kurd kir
Di berdewamê de jî Mehmûd wiha bang li gelê kurd kir: “Ez bang li hemû kurdan dikim da ku girîngiyê bidin van çalakiyan. Bi taybet çalakiya greva birçîbûnê û yên rojiya mirinê gelek girîngin. Karê herî pîroz ew e ku mirov li dijî zilm û dagirkeriyê bi çalakiyên sivîl canê xwe feda bike. Ez bang li hemû kesê dikim da ku rabin ser pêyan û li dijî zilmê dengê xwe bilind bikin. Divê ji bo bi destxistina mafên xwe çalakî bibin çandek.” GERMIYAN
