Sereştişê keyeyan ê qezaya Hewag û Xelfetî yê badê şero ke 18ê Gulane de Mehlaya Derto ya qezaya Xelfetî de virazîyabi de nizdîyê 60 kesî ameybî tepiştene û berdîbî Şaxê TEMî yê Mudirîya Asayîşî ya Riha. Kesê ke ameybî tepiştene rê îşekence ame kerdene û bi zorî îfadeyan dabî îmzekerdene
18ê Gulane de taxa Dergîlî ya qezaya Xelfetî ya Riha de şer û pêrodayîş vejîya. Netîceyê şer û pêrodayîşan de hetgirê qomserê polîsê hereketê taybet û 2 kesê ke yeno îdîakerdene ke HPGyiyî cuya xo vindî kerdî. Badê şer û pêrodayîşanê 18ê Gulane sereştişê keyeyan virazîya û nizdîyê 60 kesî ameyî tepiştene û berdî Şaxê TEMî yê Mudirîya Asayîşî ya Riha. Îfadeyê 11 kesê ke ameybî tepiştene ame girewtene. Zabitnameyê ke polîsan hadre kerdbî bi îşkence û zorî dîyenî îmzekerdene. Kesê ke sereştişê keyeyan de ameyê tepiştene Qereqolê Cendirmeyan de îşkence bi înan ameyo kerdene. Rîyê îşkenceyî ra dest, linge û sereye xeylî kesanê ke ameyê destbendkerdene şikîyayê.
Mehmet Alakûşo ke ferdê keyeyê Alakûşî yo îfadeyê xo de dîyar keno ke datê ci û pêroyê dewijan piştî dayî rêxistine. Mehmet pêvînayîşê xo yê avûkatan de vano ke raştê îşkenceyê giranan ameyo û pê domananê xo û cinîya xo ameyo tehdîtkerdene. Mehmeto ke raştê îşkence ameyo bi zorî qisey keno û îşkence vera ci de ters virazîyayo.
Baroyê Amedî reaksîyon nîşan daye û derheqê babete de eşkerayîyêk serê hesabê Twîtterî ra da. Baroya Amedî eşkerayîya xo de va : “Derheqê îşkenceyî de delîlê verbiçimî estê û tayê versûcan zî nezaretê polîsan de avûkatanê dir pêvînayîş kerdo.”
Eşkerayîye de no amebi vatene: “No sûc o. Îşkence goreyê qanûnanê neteweyîyan û mîyanneteweyîyan qetîyen teberê huqûqî de yo. Hayîdarî amîya ma ke 12 kesê ke qezaya Xelfetî de ameyê destbendkerdene, înan rê îşkence ameyo kerdene. Pîya bi kesanê ke dima ameyê destbendkerdene nika 35 kesî destbendkerde yê. Bi hawayêkê nêhuqûqîyî heqê pêvînayîşê avûkatan bi muwekîlanê înan dir ameyo astengkerdene. Her çend yew muwekîlî ra zêdeyêr muwekîlê avûkatêk estbê zî tena yeno verdayene ke yewî dir û bi hawayêkê xeylî bisînorî pêvînayîş bikero. Pêvînayîşê tayê avûkatan zî nezaretê polîsan de ameyo kerdene. Delîlê verbiçimî estê ke îşkence ameyo kerdene.”
Serekê Baroya Amedî Abdullah Oncenî ke bi Serdozgerîya Komarî ya Riha reyde pêvînayîş pê ardo waşt ke sînorkerdişê muwekîlî yê seba avûkatan wedarîyo, pêvînayîşê muwekîlan polîsan reyde nêro kerdene, îşkence û muameleyê xirab vera kesê tepişteyan de nêro kerdene. Oncenî va: “Kesê ke ameyî tepiştene binê kontrolê edlî û heme tewirê kontrolê weşî ra bêrî derbazkerdene. Serdozgerî îdîa kerd ke îşkence zûrî yo û do babete reyde eleqedar bibo.”
Serekê Merkezê Heqê Merdiman yê Baroyê Amedî Gokhan Dayikî eşkera kerdibi ke kesê ke ameyê destbendkerdene îşkence înan rê ameyo kerdene. Dayikî ard ziwan ke destbendkerdişî dewam kenê, nameyê 38 kesanê ke ameyê destbendkerdene resayê înan.
Se bibi?
Mehlaya Derto ya qezaya Xelfetî ya Riha de şerê 18ê Gulane de hetkarê komîserêkê têgêrayîşê taybetî amebi kiştene, 2 polîsî zî birîndar bîbî.
Dorpêştiş dewam keno
Hetêna ra dorpêştişê leşker û operasyonê mehlaya Derto dewam keno. Dewa Derto û dewanê dormeyan de têgêrayîşo leşkerî dewam keno. RIHA
