Helbestvan Rênas Jiyan ji bo dayikên ku ji bo zarokên xwe yên di greva birçîbûnê de li ber xwe didin got: “Her yek ji wan helbestek e. Mafdar in û bawer dikim wê bi ser bikevin.”
Çalakiya nobetê ya dayikan ku ji bo zarokên xwe yên di greva birçîbûnê de li dar dixin didome. Helbestvan Rênas Jiyan bal kişand ser berxwedana dayikan û wiha got: “Her yek ji wan helbestek e. Mafdar in û bawer dikim wê bi ser bikevin.”
Jiyan bal kişand ser rewşa girtiyên di greva birçîbûnê de û çalakiya nobetê ya dayikan û wiha got: “Kesên rewşa dayikên me fêm nekin û tahdê li wan bikin, bila baş zanibin wê tu carî bi ser nekevin. Ji ber van pêkanînan em pir li ber dikevin. Di vê pêvajoyê de heçî kesên dibêjin em mirov in û li ber van heqaretên tên kirin xwe li nedîtiyê datînin, em nikarin ji wan re bêjin ev kes mirov in. Divê em tiştên tên serê dayikan hîs bikin û rêz û hurmetê nîşanî dayikan bidin.”
Jiyan diyar kir ku kesên qîrîna dayikan nabihîsin û destekê nadin wan kirinên wan ne kirinên mirovane ne û got: “Fikr û dîtinên mirovan dibin ku cuda bin. Heta dibe ku di warê fikrî de dijberî hev bin jî. Lê dema mirov ji bo azadiyê tev bigere, divê heçî kesên ji xwe re dibêjin em mirov in rêzê nîşanî vê çalakiyê bide.” RIHA
