Baroyanê Vakûrê Kurdistanî derheqê îşkenceyê Xelfetî de eşkerayîyêk daye û va: “Seba ke înan ke îşkence kerdo verê huqûqî de hesab bidê, çi ke destê ma ra yeno ma do bikerê.”
Baroyanê Semsûr, Agirî, Êlîh, Çewlîg, Bedlîs, Amed, Colamêrg Îdir, Merdîn, Mûş, Sêrt, Riha, Şirnex, Dêrsim û Wanî derheqê îşkeceyê Xelfetî de eşkerayîyêka hempare daye û vat ke îşkencekarî do hesab bidê.
Eşkerayîye de ame vîrardene ke sereştişê keyeyan ê qezaya Hewag û Xelfetî de nizdê 60 kesê ke amebî destbendkerdene amebî berdene bi Şaxê TEMî yê Mudirîya Asayîşî ya Riha. Ame zanayene kesê ke sereştişê keyeyan de ameyê destbendkerdene wextê sereştişî de Qereqolê Cendirmeyan de îşkence înan rê ameyo kerdene. Rîyê îşkenceyî ra dest, linge û sereyê xeylî kesanê ke ameyê destbendkerdene şikîyayê.
Dewamê eşkerayîye de ca dîya nînan: “Ma sey pawitoxanê heqê merdiman eşkera vanê ke kam ke goreyê qanûnî tê nêgêro suce keno. Îşkence nêvînayîşî ra yeno û derheqê nê îşkencakaran de tehqîqatêk nameyo destpêkerdene. Goreyê Peymana Heqanê Merdiman yê Ewropa yo ke morê Tirkîya zî binê ci de yo qet kesî rê ganî îşkence mêro kerdene û anorê kesêk mêro şiktene. Seba ke îşkencekarî bêrê cezakerdene ma do heme rayîranê huqûqî bişuxulnê. Wa şikê kesî çînê bo, seba ke nê hêrişkarî hesab bidê ma do çi ke destê ma ra bêro bikerê.” RIHA
