Roco ke welatê şarê Kurdî hetê dagirkeran ra ame dagirkerdişî heta eyro zehf çî destê şarê Kurdî û destê şarê bînan ke na cografyaya bi berekete de ca gênê ra ameyî girotişî û zilmêke domdar înan ser de ame rûnayîşî la na se serra peyîne de yanê bi rûnayîşê Komare dir ke bi ked û canê şarê Kurdan zî amîya awankerdişî zilmê rayedaranê Komare ro şarê Kurdî qat bi qat zêdya û çinêhesibnayîş û înkarkerdişê înan heta rocê ma yê eyroyî ame verdewamkerdişî. Nê rocanê peyînan de ma bî şahidê hîrê dîmenan ke raştîya na pergala dagirkere çimanê ma ver de vistî ra. Ma bi nê dîmenan dî ke zîhnîyetê dagirkeran nêbedelyayo.
Dîmenê yewine dîmenêke tekparêz û mêrdan ra degrote…
Çinêhesibnayîş û înkarkerdişê Komara tekperwer e ke binê sîwanê Erdogan/AKP’î de nê şîyes serran de û zêdetir zî nê çar serrê peyînan de ro şarê Kurdî ameyo zêdnayîşî rayêke bîne 19’ê Gulana 2019’ine de hetê (mêrdeyanê) muhefezekar heta laîkan, nîjadperstan heta demokratanê na pergala ra ame îlankerdişî ke go çinêhesibnayîş û înkarkerdişê şarê Kurdî de bi israrî bê. Eynî awayî bi dîmenê 19’ê na aşme hewêke bîne ame ramoştiş û îlankerdişî ke na netewdewlete bi zîhnîyetê mêrdan yena îdarekerdişî û wayîrê pergalêke desthilatîya mêrdî û tekparêze ya.
Dîmenê diyîne dîmenêke sosret, sehneyê showkarêke…
Tûtêke Ermenî (goreyê zîhnîyetê porgramkaran ra tenê kokê ey Ermenî) yo hîriyes serre, erê Welleh pancyes şîyes zî nê tam hîriyes serre hetê pêşkêşkarê kanalê tv ra ke pêgiroteyê desthilatî, qaşo alim û dindaro ke hetê Erdoganî re sey rektorêke zî ameyo tayînkerdişî ame mislimankerdişî(!) Herhalde rektor begî zehf hewesdarîya dînbedelnayîşîyan heta belkî hewsdarîya kesanê ke wextê tehcîrê Ermenîyan de dîn bi tût û cinîyanê Ermenîyan dayne bedelnayîşî kerda waşto tûtêke ser ra bo zî nê hewesê xo eda bikero. La min fam nêkerd nê rektori kam ayete yan zî kam hedîse de wendo ke tûtêke hîriyes serre verê Homayî de xeyrîmislim yeno hesabî ke heta bêro mislimankerdişî ke ey zî hewl da bi rayîrê tûtêke nê hewesê xo bi ca bîyaro?
Û dîmenê hîrine dîmenêke zulmkarî…
Cografyaya Kurdan bûst bi bûst e bîya şahidê zulm, îşkence, kiştiş û koçberkerdişê şêniyanê axa xo ke hetê dagirkeran ra înan ser de ameyê pêkardişî. Îşkenceyo ke hema dimayê dîmenê 19’ê aşme Xelfetî de hetê qiwetanê çekdarî yê na pergala înkarkerdoxe ra ro şarê Kurdî ame kerdişî rayêke bîne fikr û ramanê na pergala dagirker e yo hemverê şarê ma eşkera kerd. Rayêke bîne ame ramoştişî ke na desthilatî teberê zulm û heqaretî de şarê Kurdî layîqê çiyêke bîn nêvînena. Rayêke bîne ame ramoştişî ke zîhnîyetê na desthilatî zîhnîyetê se serran o û eke şarê ma bi yewîtî, têkoşîn û xoverdayîşê xo hemver nêvecyê go ey nê zîhnîyetê xo heta bi heta verdewam bikerê.
Her çiqas nê dîmenan de serdestî û hikmê desthilatî xo bi awayêke verdewamî bimojno ra zî ma zanê ke hemverê têkoşîn û xoverdayîşê şaran ti çiyîke nêeşkeno daîmî bo. Rocê ma yê eyroyî de xoverdayîşo ke giroteyê zindanan û çalakgerê ke teber de bi grevê veyşanî û roceyê mergî îradeyê xo hemverê pergala dagirker e mojnenê ra mîsalêke nê mîsalan ra yo ke têkoşîn û xoverdayîşê şaran serkewtiş xo dir ano.
