Leyla Guvene badê mesajê Rayberê PKKyî Abdullah Ocalanî çalakîya grevê vêşanîye ya bêdem û anêgêrayîşî peynî kerde û wedarîya nêweşxane. Sedat Akino ke Zîndanê Tîpa Eyî yê Erzinganî ra vejîya keyeyê xo yê Êlîhî de roja 140. de çalakîya xo peynî kerd û wedarîya nêweşxane
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş roja 200. de badê mesajê Rayberê Şarê Kurdî Abdullah Ocalanî ke hetê avûkatanê ci ra ame wendene peynî bîye.
Guvene 8ê Teşrîna Peyêne de Zîndanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo domnaye. Dima ra 16ê Kanûne de zîndananê Tirkîye de zî çalakîya grevê vêşanîye dest pêkerdî û 1ê Adare de zî vilayê pêroyê zindanan bî. Bi hezaran hepsîyî grevê vêşanîye de bî û xoverdayîşê zîndanan roja 162. de qedîya.
15 hepsîyê PKK û PAJKî 30ê Nîsane de çalakîya xo derbazê merheleyêka newe kerdî û rojeyê mergî dayî dest pêkerdene. Dima ra zî 10ê Gulane de grûba diyîn ke a zî 15 hepsîyan ra pê yena semedê şikitişê tecrîdê serê Rayberê PKKyî Abdullah Ocalanî dest bi rojeyê mergî kerde. Bi no hawa grevê vêşanîye derbazê merheleyêka newe bî. Pêroyê xoverdayoxan mesajê Rayberê Şarê Kurdî Abdullah Ocalanî çalakîya xo peynî kerdî.
Heto bîn ra xoverdayîşê endamê temsîlkarîya HDPyî yê Başûrê Kurdistanî Nasir Yagizî zî çalakîya xo roja 187. peynî kerd. Çalakîya endama Meclîsê Îştarî Fadîle Toke roja 127. de qedîya. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye estbî.
Leyla Guvene badê peynîkerdişê çalakîya grevê vêşanîye ya bêdem û anêgêrayîşî wedarîya nêweşxane. Sedat Akino ke Zîndanê Tîpa Eyî yê Erzinganî ra vejîya keyeyê xo yê Êlîhî de roja 140. de çalakîya xo peynî kerd û wedarîya nêweşxane. AMED
