Çalakger Îmam Şîş piştî ku dawî li çalakiya xwe anî, rakirin Nexweşxaneya Royal Gwert a Newportê. Şîş got ku dem dema hilweşandina faşîzma AKP-MHP’ê ye
Kurdistaniyê bi navê Îmam Şîş li dijî tecrîda girankirî ya li ser Rêberê Gelê Kurd Abdullah Ocalan, li bajarê Newportê yê Gallerê 161 rojan li ber xwe da. Şîş li ser banga Ocalan jî îro dawî li çalakiya xwe anî.
Piştî ku Şîş dawî li çalakiya xwe anî, rakirin nexweşxaneyê. Şîş dema ku dibirin nexweşxaneyê axivî û wiha got: “Ez çalakgerên fedaî yên vê pêvajoyê bi hurmet silav dikim û sozê didim ku em ê xeyalên wan di têkoşîna xwe de bidin jiyîn. Niha jî dem dema hilweşandina faşîzma AKP û MHP’ê û azadiya Kurdistan û Rêbertiyê ye. Doza azadiyê ya gelê kurd hê jî li pêşiya me ye. Divê gelê kurd li dora nirxên hevpar werin ba hev û têkoşînê geş bikin.”
Şîş niha li Nexweşxaneya Royal Gwert a Newportê tê dermankirin. Tê payîn ku Şîş dê çend rojan li nexweşxaneyê bê dermankirin. NEWPORT
