Rêveberiya Girtîgeha Ewlekariya Bilind a Xarpêtê, girtiyên ku 160 rojan di çalakiya greva birçîbûnê ya bêdem û dorvger de man ranakin nexweşxaneyê. Hat hînbûn ku xwîn vedireşin
Nêzî 150 girtiyên li Girtîgehên Ewlekariya Bilind a Hejara 1 û 2 ên Xarpêtê, li ser banga Rêberê Gelê Kurd Abdullah Ocalan dawî li çalakiyên xwe yên greva birçîbûnê ya li dijî tecrîdê anîn. Parêzer û Parlementerê HDP’ê yê Çewlîgê Erdal Aydemîr, piştî biryara bi dawî anîna greva birçîbûnê, hevdîtîn bi midur û dozgerê girtîgehê re kirin. Parlementer Aydemîr diyar kir ku rayedarên girtîgehê ji wan re gotine ku dê girtiyan di girtîgehê de tedawî bikin û ewê girtiyan sewqî nexweşxaneyên derve nekin.
Lê belê rêveberiya girtîgehê ya ku daxwaza girtiyan a ji bo sewqkirina nexweşxaneyê pişt guh dike, ligel ku got ewê li nexweşxaneya kampusa girtîgehê girtiyan tedawî bikin jî hêj dest bi tedawiya tu girtiyan nekiriye.
Parêzeran diyar kir ku Cengaver Aykûl, Serkan Eren û Yasîn Gungor ên ev 160 roj bûn di greva birçîbûnê de, xwîn vedireşin. Di heman demê de hat diyar kirin ku rewşa Remziye Akdag a li qawîşa jinan dimîne jî pir krîtîk bûye. XARPÊT
