Navenda Ragihandin û Çapemeniyê ya HPG’ê têkildarî operasyona dagirkeriyê ya dewleta tirk a li dijî Xakûrkê daxuyaniyek da. HPG’ê diyar kir ku wê derbeya herî mezin a dîrokê li dagirkeran bidin. Her wiha li Îdirê 5 leşkerên dewleta tirk hatin kuştin
Navenda Ragihandin û Çapemeniyê ya HPG’ê têkildarî êrîşên dewleta tirk ên li hemberî Herêmên Parastinê yên Medyayê û li Îdirê kuştina 5 leşkerên dewleta tirk daxuyanî da.
Daxuyaniya HPG’ê ya der barê êrîşên hewayî û hewldanên dagirkeriyê wiha ye: “Roja 27’ê gulanê (duh) seat 23:00’an artêşa TC’ê ya dagirker li dijî herêma Şehîd Derwêş û Şekîf yên herêma Xakûrkê ya başûrê Kurdistanê operasyona dagirkeriyê da destpêkirin. Hêzên dagirker piştî bombebarana giran a balafirên şer û helîkoperean bi danîna leşkeran a li herêmê xwestine hebûna xwe bidin nîşandan.”
Ji bo nûçeyên derew hişyarî
HPG’ê têkildarî nûçeyên derew ên çapemeniya tirk raya giştî hişyar kir û wiha got: “Çapemeniya şerê taybet, têkilî vê pêvajoyê halanên serfiraziyê di xwe dide, dixwaze rastiyê berevajî bike, bi daneyên derew û şaş hewl dide ku berfirehiya operasyona lidarxistî mezintir nîşan bide. Ev hewldana operasyona bejahiyê ku hewldana pêvajoya şer a ku par li herêma Lêlikanê dest pê kirî bibin herêmeke din jî, navê wê çawa were danîn jî, diyar e ku wê bersiva karîger a Gerîlayê Azadiya Kurdistanê bibîne û yek ji têkçûna giran a dîroka xwe wê bixwe. Têkildarî bombebaran û operasyona li herêmê ya didome de wê agahiyên berfireh têkildarî pêvajoya operasyonê piştre bi raya giştî re werin parvekirin.
Li Îdirê 5 leşker hatin kuştin
HPG’ê da zanîn ku di çarçoveya Pêngava Serfirazî ya Şoreşê ku li Eyaleta Serhedê de li Îdirê 5 leşker hatine kuştin û wiha got: “Hêzên me roja 27’ê gulanê li dijî wesayîtên zirxî û leşkerên piyade yên artêşa TC’ê ya dagirker ku ber bi rêya Qereqola Başaran a navçeya Başan Îdirê ve diçûn çalakiya sabotajê li dar xist. Di vê çalakiyê de wesayîta Amarok hate derbkirin, 5 leşker hatin kuştin û gelek leşker birîndar bûn. Artêşa TC’ê ya dagirker piştî çalakiyê bi wesayîtên zirxî û ambûlansan kuştî û birîndarên xwe ji herêmê rakir û li herêmê operasyon da destpê kirin. Ev operasyon saetên şevê bêyî ku encam bigre paş ve vekişiya.” BEHDÎNAN
