Dayika Zulkuf Gezen ê ku ji bo rakirina tecrîda li ser Ocalan çalakiya fedaî pêk anî, çû serdana kurê xwe. Dayika Havva Gezen li ser gora kurê xwe wiha bang kir: “Daxwaza hevala Leyla û hevalên wê bi cih hat. Ez hatim ku mizginiyê bidim te.”
Ji bo rakirina tecrîda girankirî ya li ser Rêberê Gelê Kurd Abdullah Ocalan, bi pêşengiya hevseroka KCD’ê û parlamentera HDP’ê ya Colemêrgê Leyla Guven grevên birçîbûnê dest pê kiribûn. Çalakî roj bi roj li welat û derveyî welat bi tevlêbûna bi hezaran mezin bibû. Di 26’ê gulanê de di roja 200’emîn a çalakiya Guven de, li ser bangewaziya Ocalan, çalakiya greva birçîbûnê û rojiya mirinê bi dawî bûbû.
Li hêla din ji bo rakirina tecrîdê, li girtîgehên bakurê Kurdistanê û Tirkiyeyê 7 ciwanên kurd li dijî tecrîdê çalakiyên fedaî pêk anîn û jiyana xwe ji dest dan. Yek ji van girtiyan jî Zulkuf Gezen bû. Gezen di 17’ê adara îsal de li Girtîgeha Jimar 2 ya Tîpa F ya Tekîrdagê çalakiya fedaî pêk anî û jiyana xwe ji dest da. Piştî ku çalakiyên greva birçîbûnê û rojiya mirinê bi dawî bûn, malbata Gezen çûn Goristana Yenîşehîr a Rezan a Amedê û gora zarokê xwe ziyaret kir.
Di dema serdanê de dayika Gezen, Havva Gezen demekî dirêj li ser gora kurê xwe sekinî. Dayika Havva ku kêliyên hestewar jiya, wiha bang li kurê xwe kir: “Daxwaza hevala Leyla û hevalên wê bi cih hat. Ez hatim ku mizginiyê bidim te.” AMED
