Derheqê qerarê betalkerdişê/Îptalkerdişê weçînayîşê Stanbulî de, munaqeşey dewam kenê. Heyetê Weçînayîşê yê Berzê (YSK), weçînayîşê 31ê Edara 2019î organize kerd û dima zî no weçînayîş pratîze kerd.
Îptalkerdişê/betalkerdişê weçînayîşê Stanbulî dima, Serekkomar Recep Tayyîp Erdoganî û hukmatê AKP û Ortaxê înan MHP hima – hima her roj vatnê ke; “No veçînayîş de, dizdey bîya.” Qerarê betalkerdişê/Îptalkerdişê weçînayîşê Stanbulî de behsê yew dizdey, yan ê yew hîleyî nêbeno.
Goreyê Heyetê Weçînayîşê yê Berzê, weçînayîşê Stanbulî de 754 sîvîlan, serekîya sindoqanê weçînayîşî de ca girewto û binê tayê belgeyan (dokum cetwelî) de imzeyî çinê. Goreyê YSK, na yew bêqanûney a, no semed ra weçînayîşê Stanbulî betal kerdo. Heyetê Weçînayîşê yê Berzê (YSK) de, 11 dadgerî (hakimî) estê. Nê dadgeran ra çar dadgeran, teklîfê betalkerdişê weçînayîşî red, hewt dadgeran zî betalkerdişê weçînayîşî eya kerdo. Nê hewt dadgeran terafê xo resmen bellî/dîyar kerdo. Nê hewt dadgeran, goreyê talîmatê Serekkomar Recep Tayyîp Erdoganî û hukmatê AKP û Ortaxê înan MHP qerar girewto. Na zî dîyar a ke çar endemê Heyetê Weçînayîşê yê Berzî, no batalkerdişê weçînayîş de îqna nêbîyê. Ne şarê Stanbulî, ne zî şarê Tirkîya; no qerar hezm kerdo. Yew zerf de, çar rayê dîyayê. Heme heyetê weçînayîşî zî eynî merdiman ra yenê meydan. Tena raya ê şaredarîya pîle/girde betal kerda. Eke hîle bîyo se, eke yew bêqanûney bîya se, ganî tena weçînayîşê şaredarîya pîlî/girdi nê, ganî heme hîrê weçînayîşê bînî zî betal bibîynê. Yewna het ra 24 Hezîrane 2018 de, Weçînayîşê Sîstemê Serekkomarîye de zî eynî merdiman, heyetê endameya yê sindoqan de ca girewtbi. Ay wex ganî Weçînayîşê Sîstemê Serekkomarîye zî betal bibîynî. Heyetê Weçînayîşê yê Berzê (YSK), hêzê asayîşê, heme sazê û dezgeyê bînê destê Hukmatê AKP de yê. Yanî asayîşê sindoqan, destê hukmatê AKP de yo. Eke no weçînayîş de Bînalî Yildirimî qezenc bikerdnî, no weçînayîş betal nêbîynî. Vanê ke; “Ma îradeyê şarî rê rêz benê.” No vatiş de hine samîmîyet nêmendo.
Nê serran de weçînayîş, weçînayîş ser o beno. Her weçînayîş de, ekonomîyê weçînayîşî pratîze beno. Her weçînayîş rê epey yew pere xerc beno. No pere zî toneka şaran ra vejîno. Xora qirîzê sîyasî, xo reyde, qirîzê ekonomîyî zî ano.
Ma roportajanê şarî Stanbulî temaşe kenê, vanê ke;” Serekkomar Erdoganî çi waşto, ma dayo ey. Serekîya Serekkomarîye waşte, ma day ey, sarayî/qesrî waştê, ma saray/qesrî zî day ey. Pere waşt, ma pere dayo ey. Hinê ma ra çi wazeno? La çi heyf ke Serekkomar Erdogan, ortaxê ey MHP asaney reyde fek Stanbulî ra verranêdanê. Aseno ke rantê Stanbulî nêbo hukmatê AKP nişno payra vindro. Stanbul; destê AKP ra vejîyo, heme Tirkîya destê AKP ra vejîna.
Weçînayîşê Stanbulî de, aseno ke kurdî; ko rayna rayanê xo bidê Ekrem Îmamoglûyî. Ay yewin; Weçînayîşê 31 Edare de, Ekrem îmamoglûyî weçînayîş qezenc kerd. Heyetê Weçînayîşê yê Berzê (YSK), mazbata ey day bere. Dima zî na mazbata ey, ey ra girewte. Ewta de yew maxdûrîyet û bêqanûney esta. Kurdî, na bêqanûney hezim nêkenê. Ay diyîn zî semedo ke rayanê nîjadperestan bigêrê, Serekkomar Recep Tayyîp Erdogan û ortaxê ey MHP; her weçînayîş ra ver, gala kurdan kenê. Weçînayîşê 23 Hezîran ra ver zî rayna dest bi operasyonanê leşkerîyan kerdo. Ma heme wext pabeyê ke, heme meseleyi; bi şer nê, bi diyalog û muzakereyan çaraser bibê. Aseno ke ne Serekomar Erdogan, ne zî partîya ey AKP, tena politikaya şerî esas gênê. Serekkomar Recep Tayyîp Erdogan û partîya ey AKP; hima nasnameyê kurdan û ziwanê înan resmîyet/fermîyet de qebul nêkerdo. Xora eke resmîyet de kurdî û ziwanê kurdan qebul bibo; meseleya kurdan zî asan çareser bena. Na eşkera ya ke, Serekkomar Erdogan û partîya ey AKP, tena menfeetê xo yo sîyasî û yê rantê ekonomîyî esas gena. Kurdî; hinê huzur wazenê. Kurdî hinê aşîtî û demokrasi wazenê. Hîvîya kurdan hinê bi Serekomar Erdogan û partîya ey AKP menda. No semed ra Weçînayîşê 23 hezîran de rayna kurdî ko rayanê xo bidê Ekrem Îmamoglûyî. La CHP û Ekrem Îmamoglû zî ganî no îradeyê kurdan bigêrê çiman ver.
31 Edare de, Ekerem Îmaoglûyî 13.739 rayî vêşî girewtbê û Serekîya Şaredarîya Stanbulî qezenc kedbê. Ekrem Îmamoglûyî Serekîya Şaredarîya Stanbulî heq kerda.
