Hewldana dagirkirina herêmên Xakurkê yên artêşa tirk rastî derbên gerîla hat. Hêzên gerîla li dijî hêzên artêşa tirk ên li ser girên Lêlikan, Şehîd Botan û Şehîd Şahan hatine bicihkirin çalakî pêk anîn. Di çalakiyan de gelek leşker hatin kuştin û gelek jî birîndar bûn
Liv û tevgera dagirkeriyê ya dewleta tirk a li derdora Bradost, Xakurkê û Lolanê didome. Bi vê armancê artêşa tirk di şeva 28’ê gulanê de çiyayê Şekîf, derdora çemê Lolanê û Girê Şehîd Dervîş bi saetan bi balafir û helîkopterên şer bombebaran kir. Artêşa tirk piştî bombebaranê jî leşkerên xwe danî ser çiyayê Şekîf û Girê Şehîd Dervîş û xwest hewldana xwe ya dagirkeriyê berfireh bike.
Hêzên gerîla jî li dijî êrîşên dagirkeriyê yên dewleta tirk duh êvarê ketin nava liv û tevgerê. Li gorî agahiyên ji çavkaniyên herêmê, hêzên gerîla li leşkerên tirk ên li ser girên herêmê xistin. Hat zanîn ku duh saet di 21:00’an de hêzên gerîla avêtin ser leşkerên li ser girên Lêlîkan, Şehîd Botan û Şehîd Şahan. Gerîla di çalakiyan de çekên giran bi kar anîn û li dijî leşkerên li ser her sê giran çalakiyên sabotajê pêk anîn.
Kuştî û birîndar bi helîkopteran rakirin
Têkildarî mijarê çavkaniyên herêmî agahî dan û daxuyandin ku di encama çalakiyên gerîla de gelek leşkerên tirk hatine kuştin û gelek jî birîndar bûne. Çavkaniyan destnîşan kir ku leşkerên mirî û birîndar bi helîkopteran ji herêmê hatine derxistin. BEHDÎNAN
