Onluyî veng da ke rastîya Dêrsimî dir bêrê têrî û va: “Daleqnayîşê yan zî wedartişê tabelayêk meseleyêko teknîkî nêyo. Tam eksê nê de gama a tabela amî daleqnayene, a îfadeyê estbîyayîşê nasnameyo ke tarîx de ameyêne vînîkerdene bi.”
Parlamenterê Partîya Demokratîke ya Şaran (HDP) yê Dêrsimî Alîcan Onluyî derheqê munaqeşeyanê ke dimayê daleqnayîşê tableya Dêrsimî de vejîyayî Meclîsî de kombîyayîşêk viraşt.
Onluyî vat Grûba Meclîsê HDPyî ya Şaredarîya Dêrsimî seba ke tabelaya Dêrsimî ya ke hetê qeyûmî ra amîbî wedartene newe ra bêro daleqnayene qerarêk da. Onluyî vat Walîtî û mehkemayanê cayîyan bicaardişê nê qerarî vindarno û va: “Belkî zî no halo rojanekerde yê tarîxî yo. Çîyê ke Dêrsim 38 de ameyî ciwîyayene no hem hetê zihnîyetî ra hem zî hetê bicaardişî ra tekerur û teberdayîşê ê wextî yo. 90 serrî yo ke pêkewtişê Dêrsim û Tûncelîyî esto.”
Onluyî dewamê qiseykerdişê xo de nê vatî: “Dêrsim 38 de hem qirkerdiş û hem zî tertele û asîmîlasyon ame kerdene. Ewro çîyo ke yeno kerdene zî dewrgirewtişê mîsyonê tarîxî yo. Gama ke 38 de şar rastê qirkerdişî ame serewedartiş çinbi. Şarî waştêne ke xo bi xozaya xo, kultur û kamîya xo îdare bikerê. Nameyê Terteleyê Dêrsimî Tûncelî yo. Yan ma do problemanê xo yê bingeyênan ê sey Terteleyê Dêrsimî bi şidet, înkar û zextan hal bikerê, yan zî ma do bi sîyasetê demokratîkî û bi pêkerdişê cimatkîyî zemînê pîya ciwîyayîşî ronê.
Ganî seba Terteleyê Dêrsimî komîsyonê cigêrayîşî bêro ronayene. Eke qanûnêk bêro vetene ganî o qanûn bêro vetene. Hewna zî cayê mezelê Seyîd Riza û embazanê ê bewlî nêyo, ganî cayê înan bêro tespîtkerdene. Ganî sere de cemxaneyî bawerî bêro naskerdene û hurmet ci rê bêro ramotene. Ma paştî danê qerarê meclîsê şaredarîya Dêrsimî. Ganî reaksîyonî ten abi eşkerayîyan nêbê. Ganî heme sazî, roşinvîr, nûştoxê Dêrsimijî û rayapêroyîye ya demokrate zî reaksiyon bidê.” ANQARA
