Hevparên TJA’yê yên Wanê diyar kirin ku ji ber gotin û pêkanînên desthilatdariyê tecawîza li dijî zarokan zêde bûye û banga têkoşîna hevpar a li dijî tundî û tecawizê kirin
Li Wanê Tevgera Jinên Azad (TJA) der barê zêdebûna êrîşa zayendî û tundiya li hemberî jinan û zarokan li baxçeya Partiya Demokratîk a Gelan (HDP) daxuyanî da çepemeniyê. Parlamentera HDP’ê ya Wanê Muazzez Orhan, parlamentera HDP’ê ya Muşê Şevîn Coşkun û aktivîstên TJA’yê tev li daxuyaniyê bûn. Daxuyanî ji aliyê aktîvîsta TJA’yê Hawar Derya ve hat xwendin.
Derya bal kişand ser polîtîkaya îktîdarê ya li hemberî êrîşa zayendî û diyar kir ku îktîdar bi nedayîna cezayan îstîsmarê meşrû dikin û wiha got: “Hişmendiya mêr di dema neolotîkê heta niha zirar daye jin û xwezayê. Her roj tundiya li hemberî jinan û zarokan zêde dibe. Li hemberî pêşî girtina tundiyê tiştek nayê kirin. Îktîdar her roj behsa mafê jinan û zarokan dike, lê tu kes biqasî îktadarê bi van polîtîkayan mafên jin û zarokan binpê nake. Em ê bi hev re bi hêzbin û em ê bi hev re biqîrin. Li dibistanê, malê û li kolanan gelo çiqas zarok bi êrîşa zayendî re rû bi rû ma? Bi sedan û bi hezaran zarok çiqas dengê xwe derxistin lê dengê wan nehat bihîstin û wekî çareserî bi êrîşkaran re hatin zewicandin. Gelo êrîşkar hatin cezakirin? Em serî hildidîn û bêdeng namînîn.”
‘Pêwîst e jin têbikoşin’
Her wiha Derya da zanîn ku ew ê her tim li dijî hişmendiya desthilatdar têbikoşîn û wiha axaftina xwe bi dawî kir: “Li kolan, mal û li girtîgehan li her derê êrîşa zayendî pêk tê. Em jin diyar dikin ku em ê vê yekî qebûl nekîn û dengê têkoşîna xwe bilind bikîn. Banga me ev e; Mêrê desthilatdar bila destê xwe ji jinan û zarokan bikişîne. Divê hişmendiya îktîdara heyî bê guhertin. Pêwîst e em jin hemû bibîn yek û li dijî vê têbikoşîn.” WAN
