Hetê Wezaretê Karanê Zereyî ra derheqê babeta vurnayîşê nameyê ‘Tûncelî’ de mufetîşo ke ame wezîfedarkerdene endamanê Meclîsê Şaredarîya Dêrsimî ra persa ‘şima qerarêko winayên çira girewt’ kerde, endaman zî vat ke no waştişê şarî yo
Meclîsê Şaredarîya Dêrsimî tabelaya şaredarîye ya ‘Tûncelî’ sey ‘Dêrsim’ vurnabî, naye ser Wezaretê Karanê Zereyî çarçewaya cipersayîşo ke dabi destpêkerdene de mufetîş wezîfedar kerd. Mufetîşo ke ame Dêrsim seba cigêrayîşê verênî banê walîtîye de îfadeyê endaman girewtî.
Mufetîşî îfadeyê 10 endamanê meclîsê şaredarîye yê ke îmzaya înan nameyê Dêrsimî de esta girewtî û persa ‘Çira şima qerarê tabelaya Dêrsimî girewt û no seba şima yeno çi mana’ kerde. Hetêna ra endamê meclîsî yê ke bi KHKyî mazbatayê înan înan ra ameybî girewtene, înan ra zî derheqê KHKyî de persî ameyê kerdene.
Endamanê meclîsî yê ke cewab da persanê mufetîşî va: “Nameyê Dêrsimî waştişê şarî yo, no hemverê qanûnan de nêyo û no name xeylî cayan de bi hawayêkê qanûnîyî ameyo şuxulnayene.”
Serekê Şaredarîye Fatîh Mehmet Maçoglûyo ke binê qerarî de îmzaya ci esta da zanayene ke hewna ro ê nêgêrayê, seba îfadeyî zî belgeyêk nêdîyayo bi ê. Maçoglûyî vat eke belge bireso ê dest o do derheqê qerarî de pawitişê xo bikero.
Meclîsê Şaredarîye nameyê Tûncelî yo ke tabela de bi kerdibi ‘Dêrsim’ no qerar hewna ke nêamebi bicaardene bi muracatê walîtîye Mehkemeya Îdareyî ya Erzîncanî ra amebi vindarnayene. DÊRSIM
