Baroyê Dêrsimî û organîzasyonanê cimatê sivîlî yê şaristanî, derheqê parlamenterê MHPyijî Mehmet Taytakî de bi sebebê qiseykerdişanê êyê derheqê Dêrsimî pêhesnayîşê sûcî kerd
Parlamenterê MHPyî yê Afyonkarahîsarî Mehmet Taytakî dimayo ke Meclîsê Şaredarîye yê Dêrsimî seba tabelaya ‘Tûncelî’ qerarê tabelaya ‘Dêrsimî’ dabi, meclîsî de qisey kerdibi û wina vatibi: “Kesê ke wazenê wextê ravêrteyî bidê têro, peynîya înan do sey peynîya kalikanê înan bo.”
Baroyê Dêrsimî û organîzasyonanê cimatê sivîlî yê şaristanî bi sebebê nê îfadeyan derheqê Taytakî de pêhesnayîşê sûcî kerd. Baroyê Dêrsimî yo ke derheqê babete de eşkerayîyêka nûştekîye daye, aye de ca dîya îfadeyanê Taytakî û ame vatene ke Taytakî binê heqê destpironêginayîşê parlamenterîye de sûc kerdo. Eşkerayîye de ame vatene ke Taytakî maddeyê 214. û 216. yê TCKyî binpay kerdê û ame waştene ke seba nê sûcê xo bêro cezakerdene.
Baroyê Dêrsimî, Komeleya Pîr Sûltan Abdalî, Komeleya Elewêyê Demokratîke (DAD) û Federasyonê Komeleyanê Dêrsimî (DEDEF) derheqê Taytakî de bi sebebo ke goreyê maddeyê “Hemverê aşitîya rayrapêroyîye de kerdişê sûcî, tehrîkkerdişê sûcî, qismêkê şarî hemverê qismêkê bînî de tehrîkkerdiş, şarî ver bi kîn û dişmenîye berdiş û qijfînayîş, hetê sinifa sosyale, nijad, dîn, mezheb û herême ra qismêkê şarî hemverê qismê bînî de bi hawayêkê eşkerayî tehrîkkerdişê bi kîn û dişmenî suckerdişî” de pêhesnayîşê sûcî kerd. DÊRSIM
