Şaxa Ewlehiyê ya Midûriyeta Emniyetê ya Wanê li dayikên girtiyan û kesên tev li çalakiyên ji bo balê bikişînin ser greva birçîbûnê û rojiya mirinê bûn, 320 lîre cezayê pere birî. Dayikan jî bertek nîşan dan û gotin ku li daxwaza aştiyê ceza hatiye birîn
Dewleta tirk li Wanê bi hinceta ‘qanûna qebehetê binpê kirine’, li dayikên girtiyan, rêveberên Şaxa TUHAYDER a Wanê û rêveber û hevserokên HDP’ê yên bajar ên ku ji bo balê bikişînin ser greva birçîbûnê û rojiya mirinê çalakî pêk anîn, 320 lîre cezayê pereyan birî. Şaxê Ewlehiyê ya Midûriyeta Emniyetê ya Wanê ku ceza birî, 3 caran cezayê pereyan li hinek dayikan birî.
Li ser mijarê, dayikên girtiyan li avahiya HDP’ê ya Wanê civiyan û bertek nîşanî biryarê dan. Hevşaredarê Bajarê Mezin a Wanê Mûstafa Avci, parlamentera HDP’ê Mûazzez Orhan, hevserokên bajêr, rêveberên TÛHAYDER’ê û gelek kesan jî piştgirî dan dayikan.
‘Ceza li banga aştiyê birîn’
Der barê mijarê de endama Dayikên Aştiyê Zekiya Kaya anî ziman ku wan ji bo ku zarokên wan nemirin û aştî pêk bê çalakiya rûniştinê pêk anîne. Kaya got ku li banga wan a aştiyê cezayê pereyan hatiye birîn. Kaya wiha dom kir: “Em vî pereyî nadin. Ji ber ku me tu sûcek nekiriye. Me destê xwe dirêjî aştiyê kir û xwest ku zarokên me nemirin. Tevî cezayan jî em ê têkoşîna xwe ya ji bo aştiyê bidomînin.” WAN
