Xelkê Mexmûrê piştî ku nimêja cejnê li mizgeftê kirin berê xwe dan ser goristanê. Piştî serdana goristanê xelkê wargehê çûn Saziya Malbatên Şehîdan û cejna hev pîroz kirin
Îro yekem roja cejna Remezanê ye. Bi vê boneyê xelkê wargeha Mexmûrê di seetên sibê de li mizgeftên wargehê nimêja sibê kirin û piştî nimêja sibê jî, berê xwedan goristana wargehê û dua kirin. Piştî serdana goristanê jî xelkê wargehê berê xweda Saziya Malbatên Şehîdan a Wargehê û li wir cejna hev pîroz kirin.
Li saziya Malbatên Şehîdan hevserokê Meclisa Gel a Wargehê Huseyîn Kara axaftinek kir û got: “ Em di serî de cejna Rêber Apo, gêrîllayên ku di çeperande li berxwedidin, girtiyên di zindanan de, dayîkên aştiyê, tevahî şehîdên Kurdistanê û cejna tevahî gelê kurd pîroz dikin. Em hêvî dikin ku wê ev cejin bibe wesîleya aştî û azadiya gelê kurd û tevahî gelên bindest.”
Kara di dewamê de got, “Bi hêviya ku em vê cejinê dinava azadî û serfiraziyê de pîroz bikin. Wê bi vê cejina remezana pîroz, di nav mede biratiyek rast û durist ku em bi serfirazî bi hevre bijîn pêkwere. Em bi hev re li ser xakek azad jiyaneke azad derbas bikin, em dubare cejna gelê xwe û hemû gelên bindest û alema îslamê pîroz dikin.”
Piştî axaftina Hevserokê Meclîsa Gel a Wargehê, gelê wargehê li Saziya Malbatên Şehîdan cejna hevdu pîroz kirin. Piştî wê jî di nava kolanên wargehê de zarokên wargehê mal bi mal geriyan û cejin pîroz kirin. MEXMÛR
