Yewendes welatanê Ewropa ra pisporî, bi amancê muhakemekerdişê çeteyanê DAIŞî yê ke Rojawanî de destê YPGyî de yê munaqeşe bikerê, paytextê Swêdî Stockholm de kombîyayîşêk viraşt
Wezîrê Karanê Zereyî Swêdî Mîkael Damberg mabênê menga verêne de seba ke çeteyê DAIŞî bêrê muhakemekerdene şibi serdana tayê welatanê Ewropa û pêşnîyazê kombîyayîşêk kerdibi.
Kombîyayîş Stockholm de ame viraştene, Norweç, Fînlandîya, Danîmarka, Avusturya, Almanya, Fransa, Belçîka, Holanda, Swêd û Îngîlîstanî ra pisporî û reyna selahîyetdarê Ûnîtado ke girêdayîyê Yewîya Ewropa û Neteweyê Yewbîyayeyî yo, tewrê kombîyayîşî bîyî.
Dambergî kombîyayîşê çapemenîye de qisey kerd û da zanayene ke, seba înan ê ke Iraq û Sûrîye de zulmêko gird kerdo bivejîyê vernîya mehkeme, çi destê înan ra bêro ê do bikerê.
Goreyê polîsê Asayîşî yê Swêdî nêzdîyê 300 cîhadciyî beşdarî mîyanê refê DAIŞî bîyî. Nînan ra nêmeyê ci agêrayî. Yeno texmînkerdene ke destê hêzanê Yewîya Pawitişê Şarî (YPG) de nêzîdîyê 50 hemwelatijê Swêdî estê. STOCKHOLM
