Artêşa tirk a dagirker li Zaxoyê ciwanekî koçber ê êzidî ku di nava baxçeyê xwe de dixebitî, bi gulebaranê qetil kir
Artêşa tirk a dagirker li başûrê Kurdistanê her roj îmze diavêje bin hovîtiyek din. Îro di roja Cejna Remezanê de ciwanekî êzidî yê bi navê Emîn Saleh ê niştecihê kampa Çem Mişko ya li navçeya Zaxo ya ser bi Dihokê qetil kir.
Emîn Saleh ku ji ber fermana 73’yan a çeteyên DAIŞ’ê neçar mabû koçê Herêma Kurdistanê bike û li kampa koçberên êzidî ya Çem Mişko diman dema li ber ava Dîcleyê di nava baxê xwe de dixebitî ji aliyê artêşa tirk ve hate gulebarankirin. Saleh ê 22 salî di encama hedefgirtineke rasterast a artêşa tirk de jiyana xwe ji dest da.
Cenazeyê Emîn Salih ber bi Şengalê ve hate oxirkirin û hate gotin ku wê li Mizargeha Deqê Mêra li Şengalê bispêrin axê.
Hêjayî bi bîrxistinêye ku artêşa tirk par jî zarokek êzidî yê bi navê Mahîr Elî li Zaxoyê di dema nava baxçeyê de bû qetil kiribû. Mahîr ê 12 salî jî di rojeke girîng a weke salvegera fermana 73’yan de hatibû qetilkirin. Emîn Saleh jî di cejna misilmanan de hate qetilkirin. ZAXO
