Hepsîyo bi nameyê Mehmet Farûk Engîno ke Zîndanê Osmanîye de tewqîfkerde yo û parçeyê şarapnelî lingê ci de estî, 2 serrî yo ke nîno tedawîkerdene. Badê ke çalakîyê grevê vêşanîye qedîya doktor ci rê vato ‘ez esker û wesayîtanê dewlete seba to meşgûl nêkena’ û Engînî muayene nêkerd
Hepsîyo bi nameyê Mehmet Farûk Engîno ke prosesê qedexeyê tebervejîyayîşê kuçeyan yê qezaya Nisêbînî ya Mêrdînê de bi hawayo birîndarî ameybî tepiştene, Zîndanê Osmanîye de tewqîfkerde yo, nîno tedawîkerdene. Sewbîna eynî zîndan de Abdulkadîr Baybars, Akar Îkbal, Adem Amaç, Yavûz Akar, Cîhan Cagfûn, Ozgur Azad Încî û Sabrî Kayayî zî nînê tedawîkerdene.
Engînî prosesê çalakîyanê grevê vêşanîye de seba şikitişê tecrîdê serê Rayberê PKKyî Abdullah Ocalanî 87 rojan grevê vêşanîye de mend û badê qedîyayîşê çalakîyan sewqê Nêweşxaneyê Dewlete yê Osmanîye ameybî kerdene. Engînî nêweşxane de nêame tedawîkerdene û tepîya erşawîya zîndan. Engînî bi rayîrê avûkatanê xo qala binpaykerdişê heqan kerd û va: “Ez 87 rojan grevê vêşanîye de menda. 31ê gulane de mi berdî nêweşxane. Fekê mi ra gonî ameyêne û ez viritêne. Doktor mi rê va ‘çîyêk to çin o. Wexto ke ez şîya verê doktor çawişêko pispor, esker û gardîyan zî hetê ci de bî. Destê mi kelemçekerde bî. Mi doktor rê vak e 3 serrî yo parçeyê şarapnelî lingê mi de yî, ez nêeşkena rayîr şêra. Gardîyan û çawîşê pispor vatî ‘na babete doktor eleqedar nêkena. Doktorê zîndanî na babete reyde eleqdar beno’ û verê doktorî ra vetî. Doktorê zîndanî tu hawa mi sewqê nêweşxane nêkeno. Doktor mi rê vano ‘ez esker û wesayîtanê dewlete seba to meşgûl nêkena.’ Lingê ki yê çepî de parçeyê şarapnelî estî. lingê mi masayeyo û ez nêeşkena pay bida erd ser. Ez tewr peynî serra 2017î de seba lingê xo şîya nêweşxane. Aye roje ra nata mi nêberdî nêweşxane. Nika vîtamînê B1 danî mi. Ma şorbe şimenî û mast û penêr wenî.” OSMANÎYE
