Esnafê Amedî yo ke krîzî xorîn hîs keno ard ziwan ke, ê rîyê krîzî ra nêeşkenê karêk bikerê. Tevfîk Kabako ke 75 serrî yo reaksîyon da û va: “Şarê keyeyî nêeşkenê pereyê nanî zî bivejê. Ma nêzanê ke vayaya goştê sûrî çiqas a.”
Çiqas ke krîzê ekonomî beno xorîn, nêrehetîyî zî benê zêde. Esnafê Amedî karnêkerdişî ra gerreyê xo keno û kuçeyî zî binê sîya bêkarîye û feqîrîye de yê. Citkarê ke hêgayan ramenê, binê barê zêdebîyayîşê malbîyayîşê mazot, derman û zibilî de pan benê.
Citkar Muhammed Duruyo ke 24 serrî yo ard ziwan ke, înan plan kerdo ke mehsulo ke destê înan de yo 50 TL ra biroşê, la mehsulê destê înan tezgehan de 5 TL ra ca dîyo û va: “Ma lîtreyê mazotî 5 TL ra gênê. 1 tonê zibilî zî 2 hezar TL yo. Pereyê nê yê elektrîkî, sondajî zî esto. Ma teyna eşkenê mesrefê xo vejê. Citkarîye merde.”
Esma Goçturk a ke 51 serrî ya û 30 serrî yo bajar de esnaf a, ard ziwan ke nê çar serranê peyênan de krîzê ekonomî bi giran û sebebê ney zî prosesê pêkewtişî yo. Goçturke ard ziwan ke ê êdî nêeşkenê karêk bikerê û va: “Seba ke merdiman de pere çin ma deyn danê û berê ke ma danê înan winî şinê. Ma tersenê ke deyn bidê şarî. No semed ra ma êdî deyn nêdanê. Seba ke şarî de pere çin o, hêzê girewtişî zî çin o.”
Tevfîk Kabako (75) ke teqawit o û bi 800 Tl keye de diwês kesan de nîyadano, reaksîyon da û têsîrê krîzê ekonomî bi hawayêkê kilmî ard ziwan û va: “Şarê keyeyî nêeşkenê pereyê nanî zî bivejê. Ma nêzanê ke vayaya goştî sûrî çiqas a. Bi hezaran merdimî kuçeyan de bêkar gêrênê. Hetê bînî ra dizdîye, fuhuş û madebestî bîye zêde. Bêrê Amed kerdo senî hal bivînê.” AMED
