Qezaya Pirsûsî ya Riha de domano ke seba roşanî ameybî verê merdimanê xo qenalê awe de xeniqîya
Dewa Xerabreşî ya qezaya Pirsûsî ya Riha de cenazeya Mehmet Emîn Bîrîşîko (14) ke vizêr vindî bibî, qenalê awe de ameye vînayene. Ame zanayene ke Bîrîşîkî Dîlok ra seba roşanî ameyo verê merdimanê xo yê dewe û vizêr şîyo verê qenalê awe û reyna nêagêrayo. Cenazeya Bîrîşîkî netîceyê xebatan yê cendirme û ekîbê AFADî de hezar û 500 metre dûrê cayo ke xebat tebe ameybî kerdene de ameye vînayene. Cenaze badê ke qenal ra ameye vetene seba otopsî wedarîya Nêweşxaneyê Dewlete yê Pirsûsî. RIHA
