Keyeyê Karakuşî ke qezaya Pêrtagî ya Dêrsimî ra waştî heywananê xo bibî wareyanê qezaya Pîlemûriye hetê cendirmeyan ra ame astengkerdene. Murat Karakuş tewrê heywananê xo ame tepiştene
Keyeyê Karakuşî ke qezaya Pêrtagî ya Dêrsimî ra waştî heywananê xo bibî wareyanê qezaya Pîlemûriye hetê cendirmeyan ra ame astengkerdene. Keyeyê Karakuşî ke verê Mektebê Yatilî yê Pîlemûriye de ameyî vindetene, vizêr saetanê şewe de tepîya agêrayî Pêrtagî. Rayîrê vindetişî de heywanêk keyeyê Karakuşî merd û birayan ra Murat Karakuşî zî tewrê heywananê xo ame tepiştene. Wesayîto ke bi heywanan dekerde yo û şoforê ci Murat Karakuşî yo, qerekolê cendirmeyan de yeno vindetene.
Keye ra Zafer Karakuşî ke Evrensel rê qala hedîse kerd qiseykerdişê xo de wina va: “Ma seba wareyanê Pîlemûriye kewtî rayîr. Wesayîto ke bi heywanan dekerde yo verê Mektebê Yatilî yê Pîlemûriye de hetê cendirmeyan ra ame vindetene. Ewja de ma rê birayê mi Cafer Karakuşî ke hefteyo verên ameybî tepiştene pers kerdî û vatî ‘Cafer Karakuş kamî ca de yo?’ Ma zî va ‘ameyo tepiştene.’ Dima ra cayo ke ameyo tepiştene pers kerdî. Ma zî dîyar kerd ke cayo ke ameyo tepiştene ma nêzanî. Ê zî vatî ‘şima dewam bikerên, ma do bivînî ke kamî ca de ameyo tepiştene.’ Badê ke ma dewam kerd, 100 ra dima bi çekan ma dayî vindetene û wesayîtan ra ardî war. Bira yê Murat Karakuşî bi mehneya îmzayo sexte tepiştî. Tewrê birayê mi heywanan zî tepiştî. Heywanê ma nika qereqol de yî. Ma zî mecbur mendî ke tepîya agêrî.” DÊRSIM
