Maseyê Gola Wanî yê ke tewirê ci teyna Gola Wanî de estê, rixmê mabênê 15ê Nîsane û 15ê Temmuze de seydê înan qedexe yo, her roje bi tonan bi hawayêko qaçax yenê seydkerdene û qetilkerdene
Maseyê Gola Wanî mabênê 15ê Nîsane û 15ê Temmuze de koç kenê û hakan kenê. Coka nê tarîxan de seydê înan qedexe yo. Rixmê naye zî her roje bi tonan Maseyê Gola Wanî bi hawayêko qaçax yenê seydkerdene. Bi taybetî Erdîş û Bêgirê yê ke koçê maseyan giranî yeno kerdene de, qirkerdişê maseyan qewemîyeno. Çemê Zîlan û Delîçayî yê Erdîşî, Çemê Bendî Mahî yê Bêgirê de koçê Maseyê Gola Wanî yeno kerdene. Maseyî seba ke hakan bikerê ver bi çemanê Westan, Adîlcewaz û Ahlatî koç kenê.
Seydê qaçaxî reyde rîyê ocaxanê qumî yê çemanê Bendî Mahî, Zîlan û Delîçayî ra bi se hezaran maseyî mirenê û bi mîlyonan hakê maseyan zî çin benê. Çemê ke maseyî koç kenê awankerdişê ocaxanê qumî qedexe yo, labelê seba ke dewlete destûr dayo bi serran o maseyî bi hawayêkê komî yenê kiştene. Seba ke ocaxê qumî awa kenê sey çamure, maseyî û hakê înan bêhewa manenê û mirenê.
Hetê bînî ra bendê ke serê çemanê Zîlan, Delîçay û Bendî Mahî ameyê awankerdene, rayîrê koçê maseyan birnenê. Rîyê naye ra bi mîlyonan maseyî nêeşkenê koç bikerê ke hakanê xo cayanê pakan de bikerê. Coka mecbur manenê ke hakanê xo cayo ke tede yê bikerê. Hakê înan herikîyayîşî reyde kewenê mîyanê awa Gola Wanî û uca mirenê.
Wextê berardişî de her maseyêk de qasê di hezar û çar se hakî estê. Rîyê seydwanîya demê qedexekerdişî ra roje de bi qasê hîrê tonî masî yenê kiştene. Seydwanîya nê demî bi taybetî bi şewe yena kerdene û maseyê ke yenê seydkerdene bi kamyonan bajaran ra yenê vilakerdene. Seba ke tedbîrê ke ameyê girewtene kêm ê, her roje bi tonan masî yenê seydkerdene. Yeno vatene , eke tedbîr nêro girewtene beno ke peynîya Maseyanê Gola Wanî do bêra. WAN
