Artêşa tirk weke li Efrîn û gelek deverên din, li Serêkaniyê jî agir berda berhemên cotyaran. Di encama şewata li Serêkaniyê de zêdetirî 25 donim berhemên cotyarên gundê Keştoyê şewitî
Li seranserî Kurdistanê hêzên artêşa tirk, çeteyên girêdayî wê û çeteyên DAIŞ’ê dema ku dê cotyarên Kurdistanê berhemenên xwe yên dexlûdan berhev bikin, agir ber didin berhemên wan. Yek ji herêmên ku artêşa tirk dişewitîne jî zeviyên li ser sînorê rojavayê Kurdistanê ne.
Li gorî agahiyan, leşkerên artêşa tirk ên li ser sînorê di navbera bakurê Kurdistanê û Rojava de li aliyê herêma Serêkaniyê agir bi gihayê herêma qedexekirî ya li ser sînor xist. Di encama şewatê de hilberîna genim a şêniyên gundê Keşto yê girêdayî gundewarên Serêkaniyê şewitî.
Şêniyên herêmê yekser bi alîkariya tîmên agirkujiyê û rewşên awarte çûn û dest bi vemirandina agir kir. Tevî hemû mudaxaleyan jî zêdetirî 25 donim ji hilberîna genim şewitî. HESEKÊ
