Wezaretê Pawitişî yê DYE yê Pentagonî eşkera kerd ke, înan perwerdeyê firayîşê F-35î yê pîlotanê tirkî dayo wedaritene
Seba tewirê Tirkîya yê S-400an, reaksîyonê mabênê DYE û Tirkîya şênber benê. Verê cû zî derheqê S-400an de Washîngtonî zaf reyan Tirkîya hîşyar kerdibi. Goreyê eşkerayîya Pentagonî perwerdekerdişê pîlotanê tirkî yê teyareyanê F-35î ame vindernayene.
Vervatoxê Pentagonî Mîke Andrewsî derheqê babete de va: “Xebera wezaretê ma ci ra esta ke êdî pîlotê tirkî wareyê hewayî yê Luke de tewrê perwerdeyî nêbenê.”
Andrewsî da zanayene ke heta Tirkîya na polîtkaya xo nêvurnayo, ê do bi qademê tewrbîyayîşê Tirkîya yê bernameyê F-35î biwedarê.
Selahîyetdarêkê bîn ê DYE zî Reutersî rê qisey kerd û vat ke, înan rîyê asayîşî ra perwedeyê pîlotanê tirkî dayo vindernayene. Labelê personelê tirkî yê ke wareyê hewayî yê Eglînî yê Florîda de yê, perwerdeyê înan dewam keno.
Wekîlê Wezaretê Pawitişî yê DYE yê Patrîck Shanahanî, mektuba xo ya ke wezîrê tirkî Hûlûsî Akarî rê şawita de vatibi, eke Tirkîya girewtişê S-400 ê Rûsya ra dest nêanca, ê do gamanê cidîyan bierzê û Tirkîya hîşyar kerdebî.
Rayberîya DYE da zanayene ke ê do tewrbîyayîşî yê bernameyê F-35î 31ê Temmuze de biqedênê û ekîba ke çarê ci pîlot ê, bi temamî 42 personelî agêrê welatê xo. WASHÎNGTON
