Heyetê Weçînayîşî yê Berzî qedexeyê seba weçînayîşê Stenbolî dayî destpêkerdene
AKP’î bi derba Heyetê Weçînayîşî yê Berzî (YSK) weçînayîşê Stenbolî betal kerdibi. 23ê Hezîrane de do weçînayîş reyna bêro kerdene. YSKyî qedexeyê seba weçînayîşê dayî destpêkerdene. Partîyê sîyasî û namzetê xoserî heta qedîyayîşê demê propaganda do eşkenê bi rayîrê weşanî reklam û propagandaya xo bikerê.
Heta peynîya weçînayîşî serê rayîranê rayapêroyî de, îbadetxane û banê ke wezîfeyê rayapêroyî yenê kerdene de xebatê propaganda do qedexe bibê. Reyna heta peynîya weçînayîşî propagandaya bi emaîl û smsyan zî do qedexe biba. Mîyanê 10 rojanê vernîya raydayîşan bi rayîrê çapemenîye û medya propaganda do qedexe biba. Eke persnameyî bêrê kerdene zî ganî persnameyî eşkera bêrê kerdene.
Tirkî reyde bi ziwan û lehçeyanê cîyayan zî propaganda do eşkena bêra kerdene. STENBOL
