Adiro ke verê di rojan netîceyê pêrodayîşî de bi Koyanê Omerîyan yê Nîsêbînî û xeylê dewanê herême kewt, hetê zerrîwaştox û dewijan ra ame hewnakerdene
Verê di roja badê pêrodayîşanê mabenê esker û gerîlayan adir bi Koyanê Omerîyan yê Nîsêbînî kewt û şewat bi tesîrê vayê zêde vilayê xeylê dewanê herême bî. Vizêr saetanê roje de dewijî waştbî ke mudaxaleyê adirî bikerî, la eskeran destûr nêdabî. Ame zanayene ke adir saetanê şewe de hetê zerrîwaştox û dewijan ra ame hewnakerdene. Netîceyê şewatî de bi seyan hektar raşteyê daristanî û masulê dewijan zirarêko gird vînayî. Sewbîna ame dîyarkerdene ke xeylê heywanî zî şewat vera telef bîyî.
Dewijê ke reaksîyon nîşanê vindetişê hukmatî dayî dîyar kerdî ke ganî hukmat vera na babeta ke her serre eynî wextî de kewena rojeve û xeylê zirar dana mulkê înan de hîsgerî têbigêra û çareserîyêk bivîna. Badê hewnakerdişê şewatî ame eşkerakerdene ke dewa Zivingî ser o ra seba herême bi wesayitanö ekseri sewqiyat yeno kerdene. MÊRDÎN
